Despues di Strea Chikí 2015 hopi eksitoso, e aña aki Strea Chikí huntu ku Kiddi lo tei bek pa nos muchanan den su di tres edishon; lo bai tin kanto i baile pa muchanan di 8 te ku 14 aña kompetí. Ta for di komienso di aña, Strea Chikí Kiddi a sali ku e parti di inskripshon, pero djasabra dia 12 di mart e inskripshon lo sera definitivamente. E dia aki lo tin un atardi di info pa tur mucha ku a inskribí. Esaki lo tuma lugá na Biblioteka Nashonal di 3 pa 5’or. E kompetensia/programa mes ta sigui ku un oudishon dia 19 di mart den e ouditorio di nos Biblioteka Nashonal. Despues ta sigui ku e di dos oudishon dia 20 di mart tambe den ouditorio. Kuart final lo tuma lugá na Sambil dia 28 di mei. Semi final lo tuma lugá 13 di ougùstùs na International School. E final lo tuma lugá dia 5 di novèmber, tambe na International School.

Inskripshonnan ta grátis pa tur mucha ku ke partisipá i por inskribí na tur e skolnan básiko, Biblioteka Nashonal, Xerox, Zero Gravity òf riba e página di Strea Chikí riba Facebook. Nos ta kere den futuro di Kòrsou i ta p’esei nos ta invertí den nos muchanan. Partisipantenan tambe lo risibí algun workshop di entre otro téknika di kanto, bos, presentashon, baile i motivashon.

Un inovashon ku Strea Chiki Kiddi a bin kuné e aña aki ta e Vip Chikí kual ta un “Discount Card” pa tur mucha ku ta interesá. Tambe e lo ser regalá na e muchanan ku sobresalí na skol. Muchanan ku ta interesá den e Vip Chikí por pasa na Xerox Docucentro i pidi nan karchi pa solamente 5,- florin. Si tin kualke pregunta por tuma kontakto libremente ku e personanan di e organisashon na 526-7878  of  675-9934.