E ambiente tabata fenomenal, cu un entusiasmo contagioso na Centro di Bario Brasil, na unda un total di 111 cantante a inscribi pa participa na Aruba Caiso & Soca Monarch 2019.

Esaki ta haci ACSM2019 gigantesco, cu 4 anochi di Preliminaries (4-7 februari) y e Super Saturday (9 februari). Pues, 5 anochi pa disfruta di nos talentonan local.

Na e manera cu e participantenan a yega na e anochi di registracion, por mira caba cu nan ta cla pa impacta cu shownan espectacular. Riba e lista por mira nombernan nobo, nos defending Monarchs, Blacky y T-Money y tambe veteran.

Stichting Musica ta invita Aruba pa probecha di e Early Bird package deal cu ta obtenibel na Citgo Boulevard, Citgo Palm Beach, Citgo Ponton, Citgo Santa Cruz, Citgo Essoville y na oficina di Fun Miles. E oferta aki costa solamente 85 florin pa aceso na tur 5 anochi di festival na Carnival Village.

Carnaval 65 lo keda marca den historia, paso cu e line up gigantesco aki, indudablemente nos lo saca produccion riba nivel halto y cu lo bira e clasiconan di futuro.

Stichting Musica ta gradici y desea exito na tur cantante y musico pa nan participacion. Tambe elogio na e branding partner Setar NV y sponsors di e festival Aruba Tourism Authority, Aeropuerto Internacional Reina Beatrix, Tropical Bottling NV, Elite Productions & Entertainment, Nagico y Ministerio di Cultura cu a bin apoya e participantenan riba e anochi di registracion. Un danki special na tur medio di prensa cu tabata presente pa cubri e anochi mahestuoso aki.