Organisacion Musica a tuma nota di un impresion cu a wordo crea door di Stichting Arubaanse Carnaval por medio di un conferencia di prensa cu lo tin algun impase of problematica andando. Di nos parti nos por sigura cu no ta existi ningun discrepancia. Tur cos ta canando ariba un bon caminda y den un bon atmosfera pa cu organisamento di e gradioso Aruba Caiso& Soca Monarch festival 2014. Ta di lamenta si SAC lo kier crea e impresion contrario innecesariamente. Nos tawata tin un encuentro y asercamento amistoso cu SAC algun siman atras, a trece puntonan di preocupacion dilanti y a wordo pidi pa manda un proposicion y simplemente esey nos a hasi tambe y tawata en espera di un contesta por escrito manera palabra. Ta di lamenta cu un biaha mas SAC ta opta pa un caminda di conflicto sin tin necesidad pa tal. Musica a asumi su resposabilidad na 2013, a demostra e abilidad, disposicion, y boluntad, y na e momentonan aki trabounan ta avansando cu pasonan gigantesco pa presenta e festival di mas grandi cu Aruba a yega di conoce. E entusiasmo cu ta reinando pa cu e Aruba Caiso & Soca Monarch 2014 festival ta grandi y ta creciendo mas y mas segun e dianan ta yegando serca. Tur cos ta cla pa e di segundo edicion di Aruba Caiso & Soca Monarch tuma lugar den su cas nobo cu lo bay bira e mahestuoso Carnival Village den curason di San Nicolaas dia 11, 12, 13, y 15 di Februari venidero. Ticketnan ta obtenibel ya caba serca tur rebendedor di Lotto y ta premira un cantidad record di participacion y atendencia di parti di e publico amante di e dushi musica di carnaval.