na Alemania….

WILLEMSTAD- 6 di febrüari 2023 – Ofisina di Turismo di Kòrsou (CTB) kompañá pa 6 partner di sektor privá tabata presente na boot Düsseldorf 2023. Ta trata aki di e feria di deportenan akuátiko di mas grandi ku ta tuma lugá anualmente na Alemania. E aña aki e feria di 9 dia a tuma lugá di 21 pa 29 di yanüari i a konta ku partisipashon di kasi 237 mil bishitante i 1500 ekshibidor for di kasi 100 pais.

Durante e dianan di e feria e tim di Kòrsou a sostené 3 entrevista riba e podio di buseo tambe un entrevista na boot TV i a duna presentashon tur dia riba Kòrsou komo destinashon turístiko. Tambe e tim di Kòrsou a organisá un Curaçao Cocktail Happy Hour ku a konta ku partisipashon di 150 invitado konsistiendo di konsumidónan, operadornan di tour i representantenan di media. Mas aleu nos tim a partisipá tambe den e video promoshonal di boot Düsseldorf su edishon di próksimo aña. CTB ta gradisí partnernan di sektor privá ku e biaha aki a forma parti di e tim di Kòrsou; Sun Reef Village on Sea, Rancho El Sobrino, Dive Division, Curaçao Divers, Scuba Lodge i LionsDive Beach Resort Curaçao

E feria a brinda e tim di Kòrsou e plataforma ideal pa konektá ku e komunidat gustadó di deportenan akuátiko,  profeshonalnan i representantenan di media. Hopi di nan ya ta familiarisá ku e oportunidatnan úniko ku Kòrsou ta ofresé riba e aria di buseo pero tambe nos a topa ku esnan ku ta buskando destinashonnan nobo pa praktiká nan deporte faborito. Ku un klima perfekto i un biodiversidat úniko nos pais tin hopi di ofresé tantu riba tera komo bou di awa.