…28 di Januari proximo…

ORANJESTAD – Januari – Starbucks ta un compania mundialmente conoci pa su contribucion na e comunidad den cual e ta opera. E biaha aki Starbucks ta pone mannan hunto pa yuda realisa e caminata ‘Tene mi man y cana cu mi’ dedica na Jaynahlianne Jimenez-Rodriguez cu lo tuma luga dia 28 di januari proximo saliendo for di Fisherman Hut pa 5:30 p.m Jaynahlianne Jimenez-Rodriguez ta un mucha muhe di 2 aña di edad cu for di su nacemento ta confrontando complicacion cu su salud fisico y ta den necesidad di atencion medico den exterior. Pa por haci esaki posibel mayornan di  Jaynahlianne, IBISA y Starbucks a organisa e caminata ‘Tene mi man y cana cu mi’ pa por recauda fondo pa  Jaynahlianne por ricibi e tratamento cu e tin mester. Tur cliente di Starbucks y comunidad di Aruba por haña carchi pa e caminata aki na balor di 10 florin na cualkier establecimento di Starbucks – Renaissance Mall, Marketplace of Paseo Herencia. E caminata lo cuminsa na Fisherman Hut sigui pa Arashi pa despues cana bay bek Fisherman Hut. Pa engrandece e posibilidad di recauda fondo empleadonan di Starbucks a organisa un radiothon hunto cu Magic FM riba e dia di e caminata cuminsando 5:30 p.m live for di Fisherman Hut. Esunnan cu participa na e caminata aki lo ricibi Starbucks refreshments y premionan atractivo na final di e caminata. Starbucks ta extende invitacion na pueblo di Aruba pa hunto tene man di Jaynahlianne y cana cu’ne dia 28 di Januari proximo. Ta bon pa menciona cu registracion ta cuminsa for di 5:00 p.m. Esunnan cu ta desea di haci un donacion priva por haci esaki riba cuenta di banco: 2320330390 (Aruba Bank). Ban cana pa salud y pa un bon causa!