Ta celebra Starbucks Global Month Of Service

ORANJESTAD- April 2015: Ban cana y tene curpa den condicion; na mes momento celebra luna di servicio na comunidad hunto cu Starbucks. Durante luna di April, tur Starbucks rond mundo ta pone atencion na ‘Global Month of Services’. Tur aña mercadonan di Starbucks mester raporta oranan cu nan a dedica na servicio comunitario, ta e intencion pa tur aña di nobo demostra cu por surpasa e aña anterior. E aña aki Starbucks un bes mas lo pone enfasis riba e importancia di un bida saludabel y e movecion fisico cu ta rekeri pa mantene e curpa ‘op en top’. Ya pa 2 aña consecutivo e caminata a resulta un gran exito, esey mes ta e motibo cu e aña aki a dicidi pa cumpli cu demanda popular y un bes mas organisa e caminata. E aña aki ta bolbe uni forsa cu IBISA pa realisa e evento dedica na salud y ta yama bon bini na un otro organisacion cu ta join e ‘fun walk’, esta I Love Aruba. For di dia 1 di April por a cuminsa registra na Starbucks Renaissance Marketplace pagando solamente Afl. 10.00. Tur entrada di registracion lo bay den un fondo caritativo. E caminata lo sali 5:30PM riba 18 di April for di Fishermen’s Hut rumbo pa Arashi. Tur participante tin chens di gana premionan atractivo despues di e caminata. Tur cu ta desea di participa na e caminata aki cu nan T-shirt por cumpra esaki na Starbucks Renaissance Marketplace; ideal pa un grupo di amigo(a), famia, colega. Durante di e caminata lo tin animacion y musica dor di DJ Oscar Booy. Starbucks ta invita pueblo di Aruba pa forma parti di e dia aki y celebra nan ‘Global Month of Services’. Forma bo team y participa! Registra trempan na e caminata, ademas di ta ‘fun’ e lo ta pa un bon causa. Bisti bo keds y algo comodo, prepara pa bo tambe cana hunto cu Starbucks dia 18 di april proximo.