WILLEMSTAD – Kantante Stanley Clementina ta bek ku un kolaborashon ku ta hopi spesial na su kurason. Clementina a uni forsa ku e talentoso vokalista Qushannick ‘Qshans’ Thode ku e piesa ‘No Tratami Asina’. Aki, un pareha ta enfrenta algun reto amoroso, unda e protagonista ta pidi su enamorada pa ‘no trate asina’ i ku na final tur kos lo ta oke entre nan.   

Apesar di e pandemia di COVID-19, Stanley Clementina no ta laga e racha di bon ambiente musikal ku e ta riba dje termina por lo pronto. Segun Clementina, e piesa tabata hopi tempu den kashi te ora ela a haña e talento korekto pa kolabora ku n’e. Mes ora ku Qshans a tende e kantika, ela guste i a manda su parti pa asina krea un obra magestral.

Qshans

E ultimo añanan, Qshans ta trahando duru riba su karera artistiko, fihando su nomber den e genero di Ritmo Kombina na Hulanda, unda ela milita den front di Cache Deluxe and Cache Royale. Komo solista, Qshans a saka diferente single manera ‘Gevoelens’ na 2018 i resientemente ‘Mas Mi Drai’ huntu ku Ivanhoe Willems. Banda di su karera musikal, Qshans a realisa un soño ora ela penetra den e mundu di teatro, despues di a kompleta di estudio teatral na Music All Factory na Tilburg. Qshans a marka pouta ku su aktuashon den ‘the Lion King’ komo e suplente pa e rol di Banzai na Hulanda. Tambe Qshans a figura den ‘Mama Mia’ komo komo Pepper i den ‘Sister Act’ komo TJ, Pablo i Eddie Fritzinger na Oberhausen, Alemania, i ultimamente e obra basa riba bida di e legendario Tina Turner. 

‘No Tratami Asina’Un biaha mas e banda di kompa dirigi pa Clementina, CSHAW, ta kompaña riba e piesa aki, despues di nan debut ku nan single ‘Quarantaine’. ‘No Tratami Asina’ a keda skibi pa Qshans i Clementina, ken alabes a komposita i aregla e produkto final. Produktor Sean Cannister, biba na Merka, a meks e kantika, i Darren Gardner, e talentoso direktor di Gardner Creations, a dirigi e klip. Clementina ta trahando riba algun produkshon alentador pa fin di aña, pues sigui e página sosial di Stanley Clementina na Facebook.com/StanleyAcoustic i Instagram@stanley clementina. Un i tur por gosa di ‘No Tratami Asina’ riba plataformanan sosial popular manera Spotify, Instagram, Facebook i Youtube.

Korda pidi pa ‘No Tratami Asina’ na tur radio emisora i televishon popular riba nos islanan i bishita Clementina su página web www.stanleyclementina.com  pa keda na altura di futuro aktividat.

‘No Tratami Asina’ ta riba YouTube: Stanley Clementina & C-shaw X Qshans – No Tratami Asina