WILLEMSTAD – Kantante i kompositor Stanley Clementina su ultimo produkshon pa fin di aña ta diferente di loke nos a kustumbra di dje. ‘Papia Mi Bon’ ta un kolaborashon entre Stanley i e talentoso ingeniero musikal Albert Windster, eks integrante di banda OK. Huntu nan a modernisa e kantika original di famoso kompositor Tío Sha i a eksperimenta ku e simandan boneriano i Afrovibez, Stanley su signatura rítmiko. Kuater luna pasa, Albert a konta Stanley di señor Richard Martina, miho konosi komo Tío Sha, ku na 2010 tabata toka den un grupo musikal folklóriko boneriano Rundan huntu ku Albert.

Según Albert, semper e fiestanan tabata yen yen, pero nunka e grupo a saka e kantikanan riba un disko kompakto, loke semper tabata su deseo. Den Stanley, Albert a mira e persona perfecto pa intérpreta un dje piesanan, i asina ‘Papia Mi Bon’ a keda realisá.

‘Papia Mi Bon’ ta un himno ku ta urgí tur pa ora papia malu di hende, no lubidá pa papia su bon tambe. E clip di ‘Papia Mi Bon’ a keda edita pa Stanley mes i a keda graba den un ambiente di famía. Akí Stanley kier a kaptura e ambiente mágiko di fin di aña ku tur famía kurasoleño ta eksperensiá. Den 2019, tin kosnan grandi den tapara pa Stanley unda e lo lansa varios produkshon nobo, kolaborando ku diferente artista urbano di tanda. P’é motibu ei, Stanley no lo partisipá den e próksimo Festival di Tumba, aperar di ta ’tin un eksperensiá inolvidabel.

Korda pidi na tur radio emisora i televishon popular pa ‘Papia Mi Bon’ i ‘like’ su Facebook.com/StanleyAcoustic of bishitá www.stanleyclementina.com pa keda na altura di futuro presentashon.

Tambe por wak e clip di ‘Papia Mi Bon’ riba su página di You Tube https://youtu.be/5XmSqJofEg