KRALENDIJK, yüli 2015: Resientemente Digicel Boneiru a realisá un patrosinio adishonal na e organisashon di Special Olympics pa nan partisipashon na weganan olímpiko na Los Angeles, esaki no ta e promé biaha ku Digicel ta brinda su aporte na Special Olympics. Digicel Boneiru su patrosinio na e organisashon ta bai kompañá ku un laso di koperashon ku ta keda sostené den transkurso di henter e aña; asina por menshoná ku e muchanan di Special Olympics ta risibí aporte di spesial pa partisipá na entre otro kampeonatonan internashonal, aktividatnan di formashon personal i sosial, pero tambe por konta ku un sosten inkondishonal di maneho di e empresa. Ta konosí ku fundador di Digicel Group, sr. Dennis O’Brien ta fiel sostenedó di e organisashon di Special Olympics mundialmente i Boneiru no ta un eksepshon. Na 2003, sr. O’Brien a te hasta presidí ‘Special Olympics World Game’, pues atletanan spesial semper tin un lugá importante den su kurason.

E biaha aki Special Olympics Bonaire ta preparando pa nan partisipashon na weganan olímpiko Los Angeles, California entre 25 di yüli i 2 di ougùstùs próksimo. E aña aki weganan olímpiko pa atletanan spesial ta spera partisipashon di 7,000 atleta spesial, 3,000 entrenador, 30,000 boluntario- tur for di mas ku 150 pais. Ademas di esaki ta spera un públiko di aproksimadamente 500,000 hende pa e weganan na Los Angeles. Digicel Boneiru ta orguyoso di por aportá na e fundashon lokal, Special Olympics Bonaire pa nan partisipashon. Riba dia 24 di yüli durante di un evento spesial, atletanan spesial di Boneiru lo topa ku presidente di Digicel Group, sr. Dennis O’Brien. 

“Nos ta deseá tur atleta hopi éksito ku nan partisipashon i ku nan disfrutá plenamente di e weganan olímpiko. Ku den forma determiná nan por logra nan meta i sobresalí ku kada intento”, esaki di akuerdo ku Gerente General, sra. Rachel Brathwaite. Riba foto por haña un impreshon di e momentu ku a hasi e donashon na Special Olympics Bonaire. Hopi éksito!