WILLEMSTAD — Durante di un reunion general èkstra ordinario ku a tuma lugá ayera djamars dia 7 di òktober na Curaçao Festival Center, Direktiva di AMAK a trata vários tópiko relashoná ku Festival di Tumba 2014 / 2015, pero tambe a elaborá riba e asuntu di protekshon di merkado. Durante di e reunion aki, a bini bon kla dilanti ku e protekshon pa nos artistanan lokal ta data for di 1976, na momentu ku despues di un lucha hopi largu, músikonan di e tempu ei a respaldá nan direktiva pa logra ku Minister di Hustisia di e tempu ei Sr. Ernest Voges a firma un dekreto Ministerial dia 13 di febrüari. Protekshon di merkado ta algu masha komun den mundu artístiko rònt mundu i ta bon pa nos menshoná aki nan ku na nos hermana Isla Aruba, e Gobièrnu tin  un maneho kompletu pa lokual ta trata protekshon di nan artistanan durante hinter aña pero muy espesial durante luna di desèmber i temporada di karnaval. Ta bon pa menshoná tambe aki ku tur Gezaghebbernan di turno i Ministernan di Hustisia a respetá i respaldá e dekreto Ministerial menshoná, loke a kondusí ku na aña 1995 a lanta un komishon Buitenlandse Evenementen i AMAK a bira un dje sinku miembronan di e komishon. Durante di e reunion a bini bon kla dilanti e respaldo total ku direktiva a haña den pasado di Sr. Elmer “Kade” Wilsoe komo Minister di Hustisia, na momentu ku tabata tin un trato desigual entre Aruba i Kòrsou pa lokual ta trata entrada di artistanan. Na sierto momentu Minister Wilsoe e tempu ei a deklará un periodo ku ningun artista no por drenta Kòrsou tanten ku e asuntu di Aruba i Kòrsou no keda reglá. Ku e sosten aki, direktiva di AMAK a logra yega na un akuerdo ku Aruba pa trato igual di nos artistanan na Aruba. Eiden a keda stipulá bon kla ku Artistanan di Kòrsou por drenta Aruba ku eksepshon di temporada di karnaval, pero hamas i nunka dos grupo musikal di Kòrsou por aktua simultáneamente na Aruba i semper bai mester tin artistanan di Aruba den e evento. Na momentu ku a bira konosí ku e grupo Kassav lo bini Kòrsou. Direktiva a manda un karta fechá 12 di sèptèmber 2014, kaminda a splika Minister di Hustisia Nelson Navarro, e posishon di AMAK, ku durante luna di desèmber ni karnaval no por tin artistanan estranhero, espesialmente pa duna nos artistanan nan ku durante hinter aña no ta haña sufisiente oportunidat i entrada, oportunidat pa haña presentashonnan i entrada pa yuda kubri e pèrdida ku nan a sufri durante hinter aña. Te ku awe AMAK no a haña ni sikiera un reakshon di Minister Navarro, pero nos a komprondé ku ya kaba, kontra di e prosedura normal, kaminda tur petishon ta wòrdu trata den Komishon Buitenlandse Evenementen promé, a duna di konosé ku Minister Navarro ta bai di akuerdo pa e grupo presentá. Si nos ke krea e ambiente den komunidat ku un dia nos tin ku para riba nos mes pia, ku nos ke yuda fomentá “Nation Building”, anto na promé lugá nos mester kuminsá duna rèspèt na nos mes hendenan i nos mes artistanan. Ya kaba nos a tende vários rumor ta sirkulá, den kual kompanianan priva ke buska bandanan djafó pa bini Kòrsou durante dianan di fiesta i laga nos artistanan un banda. Pa AMAK e kapítulo aki no ta será ainda i nos lo sigui hasi uso di tur medionan ku tin na nos disposishon pa defendé e kousa di artistanan lokal. Pa lokual ta trata e tópiko di Festival di Tumba 2015, lo bini mas informashon despues.