Subway ta invitá fanatikonan di siklismo

Willemstad, Kòrsou- OUG 2018: Dia 26 di ougùstùs próksimo Subway ta invitá tur siklista di MTB pa forma parti di ‘Sorsaka Vlakte Race’. E start i final di e kareda di mountain bike lo ta riba lugá di parker di Curinde Freezone na Hato. E kareda mes ta kuminsá 7:30AM pero por registrá for di 6:30AM. Tur siklistanan for di 6 pa 55+ aña ta bon bini pa partisipá.

E aña aki Sorsaka Bikers ta selebrá 15 aña di eksistensia. For aña 2013 nan ta organisando e ‘Vlakte Race’ ku hopi éksito. Subway for di 2014 ta patrosiná e kareda di MTB i ta masha kontentu di un biaha mas por invitá siklistanan di MTB pa registrá, i fanatikonan pa apoyá tur siklista partisipante. E kareda ta yen di adrenalina i tur aña di nobo ta konta ku partisipashon masal. Inskribí na Vista Bike òf Dasia; partisipashon pa miembro di Curaçaose Wielerbond (CWB) ta Fl. 15.00 pa adulto i Fl. 10.00 pa mucha. Pa esnan ku no ta miembro e inskripshon ta Fl. 25.00 pa adulto i Fl. 15.00 pa mucha. Ta posibel pa partisipá den tur kategoria usual. Ademas di e kareda normal tin posibilidat di partisipashon pa esnan ku ta deseá di rekreá riba baiskel tambe. Subway i Sorsaka Bikers ta hasi invitashon na tur siklista di Kòrsou. Pa mas informashon tokante di ‘Subway Vlakte Race’ por bishitá https://www.facebook.com/sorsakabikers/