Locual no a spera, pero sigur un sorpresa placentero pa e publico carnavalesco, tabata e grandura, bunitesa y luho di nos Parada Grandi di Carnaval 62.
For di inicio di e temporada di carnaval, tumando na cuenta e tempo limita, no a spera e cantidad grandi di participante manera ta custumber. Sinembargo, riba 2 di januari durante Fakkeloptocht por a mira un record di cantidad di participante. Asina mes mayoria di grupo di carnaval a experiencia un acogida basta abow pa loke tabata inscripcion pa cu e paradanan grandi. Por a compronde cu e gruponan a tuma inscripcion te na ultimo momentonan, yegando e ultimo fin di siman di carnaval grandi.
Pa e motibo ey, e placer tabata hopi grandi pa mira e cantidad di participante, roadpiece, bodypiece y fantasia carnavalesco en general riba caminda for di diasabra na San Nicolas. Gruponan a trece un sin fin di tema creativo, luho, bunitesa y uniformidad pa Carnaval 62. SMAC, encarga cu e guia di e paradanan a experiencia retonan pa sigura cu e paradanan por a cana riba un tempo favorabel pa e participantenan por a luci nan trahe y pa publico na banda por a admira esaki tambe. Un esfuerzo grandi di parti SMAC y su boluntarionan, conhuntamente cu sosten di KPA, a ser haci pa sali na tempo y caba na un ora acceptabel.
En berdad e paradanan di diasabra y diadomingo a pasa e orario stipula di 7’or, pero den ambos caso a logra caba prome cu 8’or. Den e reunion pendiente cu tur stakeholders, sigur lo sinta y hunto evalua e pro y contra di e orarionan stipula y eventual cambionan cu lo bin ariba mesa. Carnaval ta rekeri hopi organisacion y bon comunicacion entre tur esnan envolví, esaki tabata y sigur lo sigui ta e manera cu lo bai dilanti pa cu evaluacion y preparacion di Carnaval 63.
SMAC kier gradici tur gruponan di carnaval, nan lidernan y participantenan, cu a sa di tene e nomber di Aruba su Carnaval na halto e aña aki. Tambe kier gradici tur e “Royals” pa nan bunita presentacion y representacion durante e paradanan. Un danki masha grandi na Korps Politie Aruba, Servicio di Ambulans, Rode Kruis, DOW, Serlimar, DTI y Departamento di Higiena. Na e team completo di SMAC y su boluntarionan, danki di curazon. Tambe ta desea di gradici e patrocinadornan di Carnaval 62 cu ta Aruba Tourism Authority, Aruba Airport Authority, Aruba Airlines, Setar, Romar Trading, Ministerio di Cultura, Lotto pa Deporte y contribuidornan L’oreal Paris, Budget Car Rental, Delta Blue y Ananse Creative Productions. Por ultimo un pabien y danki na e pueblo Carnavalesco cu a sa di respalda Aruba su Carnaval cu nan apoyo y ambiente riba e rutanan di Carnaval y tur otro evento y actividad di Carnaval 62. Danki Aruba.