WILLEMSTAD – Ayera anochi den un esfera hopi ameno i plasentero na TuTu Tango, Skempi huntu ku su ‘branding partner’ prinsipal, United Telecommunication Services N.V. (UTS), a introdusí e promé vershon di e Skempi ‘Mobile App’. E aplikshon aki ta inisialmente solamente aksesibel pa usuarionan di Chippie, kendenan lo risibí un mensahe durante transkurso di otro siman, ku instrukshon kon pa aktivá e aplikashon aki riba nan telefòn. Aktualmente, e promé vershon di e Skempi ‘mobile app’ aki ta disponibel eksklusivamente pa telefònnan riba e sistema Android. Usuarionan di iOS lo bai risibí akseso n’e aplikashon aki riba nan iPhone promé ku yüli 2016, ya komo ku esaki ta den proseso di desaroyo kaba.
E evento aki a kuminsá ku algun palabra di Sr. Diederik Rosenbaum, Chief Commercial Officer di UTS i un di e ko-fundadónan di Skempi, sr. Gino Jacobs, kende a enfatisá e importansia i logro atkerí ku e lansamentu di e aplikashon musikal akí, no solamente p’e organisashonnan envolví, pero tambe pa pais Kòrsou i su músikonan.
Pa un kompania di telekomunikashon i un plataforma di músika djòin otro pa un kolaborashon, ta algu relativamente nobo riba nos pais, sinembargo esaki ta birando mas i mas un fenómeno
Figure 1: Boudino de Jong (Skempi), Diederik Rosenbaum (UTS) and Gino Jacobs (Skempi)
global. Na Oropa plataformanan riba internèt manera Spotify, Deezer i Netflix, tambe a sera akuerdonan similar ku kompanianan di telekomunikashon manera Vodafone i T-Mobile. Den Latino Amérika, kompanianan di telekomunikashon tambe a kuminsá adoptá e era digital, kaminda por ehèmpel Tigo a kuminsá traha huntu ku Deezer. Na un forma similar, klientenan di UTS ta bai kuminsá risibí akseso preferensial na músika Karibense den Chippieland: Kòrsou, Boneiru, Saba, Sint-Eustatius, i e parti Hulandes i Franses di Sint Maarten.
Sr. Boudino de Jong, e otro fundadó di Skempi, a duna un presentashon di e ‘mobile app’, enfokando riba e benefisionan prinsipal kual ta entre otro un lista di e 40 kantikanan mas skuchá di momento den Karibe, kantikanan nobo den Karibe i tur e Tumbanan for di añanan 1995 te ku 2015. Otro opshonnan ku ta planiá pa sali riba merkado ta enserá e posibilidat di buska kantika for di Skempi su banko di data, kual ta kontené mas ku 30.000 kantika eksklusivo den Karibe. Den futuro serkano usuarionan privilegiá di Skempi i tambe Chippie, por disfrutá di nan kantikanan faborito sin mester ta konektá ku internèt.
Trahando huntu, Skempi i UTS ta karga e futuro di músika, rekonosiendo e hecho ku músika a transformá di un produkto pa engrandesé benta pa un servisio ku ta ser ofresé na un i tur. UTS/Chippie kontinuamente ta ofresé su klientenan formanan nobo i inovativo pa mehorá nan eksperensia pa medio di benefisionan tremendo manera esaki.
E lansamentu di Skempi su ‘mobile app’ huntu ku Skempi su wèpsait eksistente, (www.skempi.com) ta hasi posibel pa nos artistanan lokal i tambe tur esnan di den region di Karibe, keda diskubrí i sostené rònt mundu. Skempi ya kaba ta ser usá dor di mas ku 90.000 persona mensualmente rònt mundu, miéntras ku e kantidat ta siguí oumentá gradualmente. Ku e aplikashon aki di Skempi, klientenan di Chippie por disfrutá di nan tumba faborito di antaño te ku esun di mas resien.
Bishitá Skempi su plataforma awe mes i disfrutá di e mihó eksperensia musikal!