registrá bo plan di fakansi na tempu

Pa temporada di fakansi ku ta kuminsando, grandi i chikí ta bon bini na Parke Tropikal. Bou di guia di gerente di parke i voluntarionan un i tur por haña un tour informativo i interaktivo kaminda e bishitante por apresiá tur nos bestianan, siña kuida nos naturalesa i kuido di bestia en general. Pa tur kos kana nechi durante di e temporada drùk di fakansi nos ta pidi tur grupo pa registrá na kantor di Parke Tropikal na 736 01 88 òf manda un email pa info@parketropikal.com. Banda di e registrashon di gruponan di plan di fakansi ta invitá un representante di kada grupo pa ta presente na un anochi di informashon tokante regla di aktividat den parke ku ta tuma lugá djasabra dia 29 di yüni di 7or pa 8 or di anochi na ofisina di Parke Tropikal (entrada Reigerweg z/n). E anochi di informashon aki ta importante ya komo ku delaster tempu e parke a eksperensia diferente destrukshon. Pa evitá esaki direktiva nobo di parke a instituí un regla nobo ku no ta permití grupo grandi drenta sin guia i si ku a duna notifikashon adelantá.  Banda di e regla nobo aki ta implementando diferente otro regla pa garantisá seguridat di e bestianan i e parke den su totalidat. Ta pidi pa un i tur respetá e área i e bestianan, tene limpi, i no kibra mata òf tira kos den kouchi di bestia. No ta permití baiskel, scooter, skateboard etc den parke. Hopi bochincha i korementu rònt den parke tambe ta agitá e bestianan i ta hasi nan hopi krepchi. Ban mustra ku nos tur ta Bon Yu di Korsou i respetá e reglanan vigente di Parke Tropikal. Pa garantisá ku tur grupo ta haña un bon servisio  tur e voluntarionan i kuidadonan di bestia ta pasando den un periodo di estudio pa amplia nan konosementu general di e parke i su bestianan pero tambe di e desaroyonan ku ta na kaminda. E bestianan tin un kuido optimal i un dieta balansa ku ta keda di monitor pa nutrishonista i veterinarionan di Parke Tropikal. Un team di seguridat tambe ta funshoná 24 ora pa dia pa evitá destrukshon den e area. Parke Tropikal pa temporada di fakansi aki tambe tin un atrakshon adishonal konhuntamente ku CurAquaFun. Pa solamente 5 florin muchanan por kana den un bala riba awa. Registrá bo grupo di plan di fakansi na tempu na 736 01 88 i ban siña i dibertí den dushi ambiente den Parke Tropikal.