WILLEMSTAD/BARBER — Djadumingu awor dia 26 di novèmber, lo tin siere di e temporada di selebrashon di e 30 aña di e tremendo kansion “Primintími” kantá pa Wini Poulo. E siere di e temporada aki no solamente ta tokando e piesa aki, pero e forma ku esaki lo keda ehekutá. Djadumingu dia 26 di novèmber e kansion lo ta den un bachi nobo, esta lo keda interpretá pa un Big Band di Karimbo. Manera ta konosí, ya tabata tin dos aktividat di selebrashon di e kansion “Primintími”. E promé a tuma lugá den luna di yüli na Hòfi Popo Rojer na Barber i e di dos na La Palapa Papito na Rooi Santu. Ámbos aktividat tabata un éksito total.
Djadumingu dia 26 di novèmber awor lo sera e selebrashon aki ku broche de oro den Parke Himno i Bandera na Barber, kaminda lo tin presentashon di Big Band Karimbo bou di enkargo di maestro Enrico Henriquez.
BIG BAND KARIMBO
Normalmente, e agrupashon musikal Karimbo ta presentá den un konstelashon normal di piano, bass, tres, timbal, konga i kampana i den metal 2 tròmpet i 2 trombon. Big Band Karimbo a amplia esaki ku 4 sax, repartí den 2 alto, 1 tenor i 1 báritòn i tambe lo tin 1 cello i tambe 2 viol. Big Band Karimbo lo keda formá pa e siguiente músikonan i kantantenan:
Ruth Hoevertsz i Arjen de Graaf riba viool. Mario Sosa riba violoncello. E saxofonistanan lo ta Clifton Daal i Norbert Girigorie riba sax Alto, Tico Mercera riba sax Tenor i Roland Martina riba sax Báritòn. E trombonistanan lo ta Axel Consencion i Giovanni Atalita. E trompetistanan lo ta Churandy la Cruz i Norman Kooks. Pa loke ta trata e sekshon di Ritmo, esaki lo ta na enkargo di Sharmel Statia riba timbales, Wilbert Dall riba Bongo/kampana i Leonard “Magoo” Raymound riba Konga, miéntras ku Feli Susana lo ta riba tres, Papi Susana riba upright bass i Enrico Henriquez riba piano. E kantantenan pa e okashon aki lo ta Oswin Brunken Wini Poulo i komo kantante nan invitá lo tei Wilbert “Ibi” Petronella Pempi Lucas, Frido Sommer i Ibi Consencion
MAESTRO ENRICO HENRIQUEZ
Enrico a nase na Kòrsou i a kuminsá bai siña toka piano serka Mr. Newburn Patrick. Despues tambe ela haña lès serka maestro Edgar Palm. Na 1975 Enrico Henriquez a muda pa Venezuela kaminda ela bai biba i ei el a sigui den su músika I piano. Su maestro di Piano tabata Jose Herrera, miéntras ku pa loke ta músika ela sigui studia serka maestro Cruz Felipe Uriarte. Na Venezuela, Enrico Henriquez a toka ku agrupashonnan musikal manera Grupo Clave, Oscar D’Leon pa despues e lanta su propio orkesta La Trayectoria. Ku músika, Enrico Henriquez a biaha rònt Sentro i Sur Amérika, Nort Amérika i tambe Europa hasiendo gira. Un nota interesante tabata ku den añanan 80 dor ku e tabata biaha asina tantu, e tabata saka dos pasaporte pa aña, ya ku nan tabata yena lihé ku stèmpel di e paisnan ku e ta bishitá. Algun aña pasa, Enrico Henriquez a bin biba bek na Kòrsou, kaminda e ta duna lès di músika i tambe ta toka aki na Kòrsou.
ENTRADA GRATIS
Meskos ku tabata e kaso ku e dos promé selebrashonnan , esun di djadumingu dia 26 di novèmber aki tambe lo ta grátis pa loke ta trata su entrada. E aktividatnan lo kuminsá for di 4 or di atardi te ku 10 or di anochi. Bar i Kushina lo ta bon surti. Di e forma aki ta será selebrashon di 30 aña Primintími ku Pueblo di Kòrsou. DJ Cafe Con Son Wendell Martis tambe lo tei pa toka su dushi músika. Abo tambe ta keda invitá.
Atentamente
Karimbo