Riba djasabra dia 25 di yüli entre 2 pa 7 or

WILLEMSTAD – Djasabra awor entre 2 or di mèrdia i 7 or di atardi tin un presentashon di artíkulonan di moda di pakusnan den Sambil bou di e nòmber Sambil Fashion Experience den e sentro di kompra na Veeris. E ofisina di modelo A2Z Model Management di Emilka ‘Miki’ Eustachia ku eksperensia amplio ta kordiná e evento aki.

E show di moda lo no ta konsentrá na un sitio so. Ta habri e evento den Food Court di Sambil, pero lo plama e ‘experience’ den e sentro di kompra. Esei ta brinda oportunidat na e pakusnan partisipante individual pa demostrá nan artíkulonan di moda na esnan ku ta hasiendo kompra dilanti porta di nan pakus. E pakusnan ku ta partisipá ta Beach Bag, IN Accessories, MiniMe, Basinger, Nici, Chulas, Polo, Perlei, Gef, Punto Blanco, MIC, Vall Shoes, Zolandia, Maria Pizzola i Golden Princess. A2Z ta perkurá pa e modelonan maskulino i femenino. Lo sòru tambe pa músika bibu i un ambiente apropiá. E pensamentu tras di tur esaki ta pa Kòrsou bira un sentro regional di desaroyo riba tereno di moda komo un siguiente paso den direkshon di e Kòrsou di futuro.

Siman di moda na ougùstùs

Hustamente pasobra e evento ta primintí di bira algu tremendo, ta hasi grabashon. E grabashonnan aki ta destiná pa e promé edishon di ‘Curaçao Fashion & Beauty Week online’ ku ta bai mustra den e di dos siman di ougùstùs na Caribbean Fashion Makersz TV. Ademas, djasabra awor Radio Active (104.5 MHz) na sierto ora lo transmití entrevista bibu ku doño di pakus i bishitantenan den e mall, di moda ku un públiko mas amplio por ta testigu di e akontesimentunan na Sambil. Ku TeleCuraçao ta palabrá ainda pa pasa grabashonnan mas despues, pasobra e mesun atardi tin tambe transmishon direkto di weganan importante di beisbòl hubenil

Colombiamoda 2015

Pa demostrá ku Sambil no ta keda te aki i ku nan ta serio pa promové moda, di 28 te i ku 30 di yüli e kadena Sambil ta partisipá ku su mes modelonan durante Colombiamoda 2015 na e siudat Kolombiano Medellín. Aya e kompania di orígen Venezolano ke profilá ku e ta aktivo tambe pafó di su mes frontera ku atenshon masha spesífiko pa e establesimentunan nobo di Sambil na Santo Domingo i Kòrsou.