WILLEMSTAD- Ministerio di Desaroyo Ekonómiko (MEO) a reuní resientemente ku stakeholdernan riba posibel solushonnan duradero pa ku e sitio kaminda ántes e barkunan di fruta tabata situá na Sha Caprileskade den Punda i tambe pa duna atenshon pa ku e situashon ku stèntnan den sentro di siudat.
Durante di su mihó tempunan, e merkado flotante di Kòrsou, mihó konosí komo e barkunan venezolano, tabata un di e luganan mas bunita, yen di bida i kolorido riba nos isla kaminda bo por a kumpra fruta, berdura i piská fresku. Aparte di tabata ofrese fruta, berdura i piská na un preis mas ekonómiko, e merkado tabata sirbi tambe komo un atrakshon turístiko den nos sentro di siudat.
Manera ta konosí, presidente Nicolas Maduro a tuma e desishon for di 6 di yanüari di e aña aki pa sera fronteranan entre Venezuela, Aruba, Kòrsou i Boneiru. A konsekuensia di e desishon aki entre otro e merkado na Sha Caprileskade poko poko a bin muri i den fin di siman tras di lomba nos a tuma nota ku sentimentunan miksto kon e último barkunan di fruta a bandoná Kòrsou.
Ousensia di e barkunan sigur ta krea un bashí den e bida ku nos a kustumbrá kuné den nos sentro di siudat. MEO ta konsiente ku e lokalidat na unda e barkunan tabata situá pa hopi tempu no a keda manten’é manera debe ser i ku a konsekuensia di esaki aspektonan di seguridat i higiena tambe a deteriorá. Resientemente MEO a tene un seshon di brainstorming riba e situashon aki ku diferente stakeholders enbolbí manera entre otro Duana, Kas di Kultura, Ministerio di Tráfiko, DMO, CPA, Fundashon Marshe i SKO.
Motibu di e seshon aki tabata pa huntu yega na solushonnan riba termino korto i pa pensa riba posibel solushonnan duradero pa ku e waf di Sha Capriles. A base di e puntonan ku a keda tres’é dilanti durante e reunion aki, Minister Steven Martina, den su kalidat komo Minister di Desaroyo Ekonómiko a entrega un petishon na Konseho di Minister ku solushonan integral ku MEO i e stakeholdernan ariba menshoná lo ke trese na e waf. A base di esaki Konseho di Minister, den un desishon fechá 7 di mart 2018, a bai di akuerdo pa a korto plaso limpia i drecha e waf, ofresé pèrmit pa standplaats na empresarionan lokal chikí i mediano pa nan por bende nan produktonan na e waf, ubiká usuarionan di e stèntnan den Punda i Otrabanda temporalmente na e sitio aki i stimulá doñonan di pèrmitnan di standplaats ku ta usa e waf, pa bende produktonan lokal di akuerdo ku e maneho di Standplaats ku ta vigente pa Sentro di Siudat.
Aparte di esaki lo bai traha a largo plaso riba modernisashon i renobashon di e waf pa esaki por reflehá más e imahen i kultura di nos Yu’i Kòrsou. MEO ta kere den e inmenso potensial ku e waf aki tin pa ku nos ekonomia. Perdida di e komersio venezolano den e kaso aki a habri oportunidat pa nos propio hendenan luchadó. Bin bende fruta i berduranan produsí for di nos teranan lokal, bin bende kos dushi típiko di Kòrsou. Parti anochi kisas e waf por asta keda transformá den un “Floating Street Food Alley” kaminda por ehèmpel por bende kumindanan den konsepto di un trùk di pan. Posibilidatnan ta ílimitá. Ku esaki MEO ke aportá na e empleo produktivo di Kòrsou i tambe stimulá e espíritu empresarial den nos mes hendenan lokal.
Te ahinda no ta posibel hasi petishon pa un pèrmit di standplaats pa por bende kos na e waf, enbista ku esaki ahinda ta den fase di limpiesa i renobashon. Asina ku esaki ta posibel Ministerio di Desaroyo Ekonómiko (MEO) lo anunsiá esaki via di entre otro su página di Facebook pa tur ku ta interesá por entrega nan petishon.