…riba Dia Mundial di Turismo djabièrnè último…

WILLEMSTAD- òktober 2013 – Dia 27 di Sèptèmber último mundu kompletu a selebrá e dia dediká na turismo, ‘World Tourism Day’ i aki na Kòrsou no tabata un eksepshon. CTB den kuadro di su kampaña ‘Dushi Hende’ a organisá un konferensha titulá: ‘Service Excellence Conference’ ku a konta ku un bon partisipashon di partnernan den industria i tur ku di manera direkto òf indirekto ta aportá na kresementu i desaroyo di nos produkto turístiko. E konferensha a konta ku  presensia di oradornan ku a duna nan punto di bista tokante ekselensia den servisio i a brinda hèrmèntnan balioso pa desaroyá i garantisá éksito riba e tereno aki. E konferensha a wòrdu dividí den dos seshon kaminda a dirigí e promé seshon na empleadonan ku ta den kontakto direkto ku e kliente i a focus riba nan abilidat i komportashon. Den e di dos seshon a kombiná un almuerso ku un presentashon spesialmente pa mènèdjernan. Tur partisipante a keda altamente impreshoná pa e presentashon di; Sra. Sandra Husbands ku a enfatisá riba e kultura di ekselensia den servisio i tambe a elaborá riba e.o e konekshon entre nos kalidat di bida i ekselensia den servisio i normanan di prestashon klave pa garantisá éksito. Dr. Carolin Rekar a klousurá e konferensha ku un tremendo workshop ku a hiba komo tema; “Transforming the Customer Experience from Good to Great: Unlocking the secrets that all front line staff should know. Durante di e workshop aki tur partisipante a risibí hèrmèntnan pa yuda elevá nan relashon ku kliente (e turista) i mehorá nan sentido di balor propio riba tereno personal i profeshonal. CTB por mira bèk riba un konferensha eksitoso, ku a kontribuí na desaroyo di e pilarnan den nos turismo, ta referí aki na e empleado, su mènèdjer i tur ku ta duna servisio. Un total di 80 persona a partisipá na e konferensha i na e Almuerso un kantidat di 90 persona. CTB ta suprayá e importansia di duna servisio di kalidat. Nos por tin un produkto tremendo, pero si no tin bon servisio e produkto ku nos tin ta pèrdè su balor. Konferenshanan di e índole aki ta wòrdu organisá pa kontribuí na e kresementu di e empleado. Tur persona ku a partisipá na e konferensha  a demostrá di ta mira e importansia di bon servisio, bisando esei nos ta konkluí ku e kampaña ‘Dushi Hende’ ta dunando resultadonan masha positivo”.