Den kuadro di selebrashon di “Siman di Kultura 2014” Fundashon ROSA, e organisashon di pashèntnan di STOMA a tene un eksitoso seremonia di Boutiso di Pòpchi, ku a tuma lugá den su Sentro di Rekreashon situá na Scharlooweg 23. Un kantidat grandi di persona, tantu miembro komo amigunan di Fundashon ROSA a hasi akto di presensia, pa partisipá na un di e seremonianan ku tabata un kustumber di ántes. Den pasado tabatin e tradishon, ku ta boutisá pòpchi na Kòrsou. Tabata un manera pa famia i amigunan por bin huntu i selebrá ku otro.  E seremonia di boutiso tabata práktikamente idéntiko ku boutiso di un yu resien nasi. Figurantenan tabata aktua komo pastor, yaya, madrina i padrino, tur bistí den trahenan tradishonal di e tempu ayá. Tambe tabatin mesanan dòrna ku bolo i bebida i pasaboka, kosnan dushi di ántes manera kokada, pruimu ku pindakaas, bonsbons, bolo di chukulati, kala, ets. Fundashon ROSA por mira bèk riba un dia éksitoso, ku a tres rekuerdonan grato di nos tempu di ántes.