Djasabra 25 di aprel próksimo Sentro Kultural Kòrsou un biaha mas lo tin un grandioso konsierto, e biaha aki ku nos gran músiko internashonal Eric Calmes ku lo presentá den un konsierto titulá Zamanakitoki. E konsierto lo keda tené den e Hòfi Kultural di Sentro Kultural Kòrsou i ta planiá pa kuminsá 8’or di anochi. Eric Calmes e biaha aki lo presentá ku e siguiente músikonan: Ronchi Matthew riba keyboards, Cedric Dandaré riba kitara, Konky Helmijer riba steelpan, Marvin Snijders riba percussions, Gilbert Braaf riba drums, Ismael Gonzalez i Dennis Aalse riba trompèt i Eric Calmes mes riba bas. Karchi di entrada ta optenibel na balor di naf. 55,00 na Mensing’s Caminada, 24 Uur uit de muur, Bruna, Albert Heijn i na ofisina di Sentro Kultural Kòrsou den Emmastad.

Ken ta Eric Calmes, ken ta Zamanakitoki.

Eric Calmes a nasé na aña 1955 na Kòrsou. Eric ta un basista ku prinsipalmente a traha su nòmber den e genero di Jazz na Hulanda. E a yega di presentá na diferente okashon den e konosido North Sea Jazz Festival huntu ku diferente musikonan prominente tantu di Jazz komo Latin Jazz. Eric a studia na e Akademia di Musika Sweelinck na Amsterdam. Eric su karera musikal a kuminsá den añanan 70 den e genero di salsa, pa despues e sigui den muzik di Jazz. E a toka ku diferente artista i agrupashon manera Manoushka Zeegelaar-Breeveld, Lenette van Dongen i Randal Corsen Trio pero tambe e tabatin su propio grupo ku yama Zamanakitoki, ku kua e a bai bèk su rais. Ku Zamanakitoki e a desaroyá un fushon di ritmo Karibense, tantu den un estilo di muzik Antiano moderno komo Jazz i a profundisá su ideanan musikal di un karakter úniko i inovativo. Grupo Zamanakitoki a eksisti di 1994 te ku 1998. Den e periodo aki nan a graba 2 disko kompakto (1996:Kaya Grandi i na 1997:Wiseguy). Zamanakitoki tabata konsisti prinsipalmente di komposishon di Eric Calmes mes i su tema musikal tabata basá riba muzik tradishonal di Korsou, ku influensha di entre otro jazz, salsa i musik brasilero. Musikonan ku a forma parti di Zamanakitoki ta entre otro: Pedro Libert, Mikel Foendoe, Cedric Dandaré, Izaline Calister, Dennis Aalse i Garry Francisco. Eric su diversividat no ta resaltá unikamente den su obranan komo basista. E a yega di duna lès di muzik pa un periodo largu na konservatorio di Rotterdam. Tambe Eric ta komponé i areglá piesanan pa diferente banda i artista. Eric a duna su kontribushon na realisashon di mas ku 100 CD. Semper a keda e deseo di por a trese e repertorio di Zamanakitoki un biaha mas Kòrsou. Djasabra 25 di aprel próksimo lo bai rebibá pasado ku un grupo formá ku e siguiente músikonan: Dennis Aalse, Konkie Halmeyer, Gilbert Braaf, Marvin Snijders, Ronchi Matthew, Ismael Gonzalez, Cedric Dandare i Eric Calmes mes riba bas. Tambe lo tin un “mystery guest” ku lo duna un aktuashon di sorpresa.