Riba djadumingu 22 di mart próksimo Sentro Kultural Kòrsou, bou di kordinashon di e konosido eskritor, outor i musiko señor Eric La Croes, ta organisá un interesante tayér tokante Seu. E tayér aki ta tuma lugá den e Ouditorio di Sentro Kultural Kòrsou situá na Emmastad i ta kuminsá 4’or di atardi. Asistensia na e tayér aki ta grátis. Seú di Kòrsou ta e fiesta di kosecha pa gradisí Dios, ku nos tin un bon kosecha di maishi chikí. Dia ku e maishi ta kla pa ser kosechá, tur famia, bisiña i konosínan ta bini huntu den kunuku pa asina yuda kué  e kosecha. E kosecha aki ta ser hibá mangazina, djogodó, monton, den kual ta warda e maishi. E evento di seú ta demostrá kon hendenan tabata yuda otro den e epoká ku a bai laga nos; e yudansa ku nan tabata brinda otro den kosecha di e maishi, tabata un ayudo por nada. Selebrashon di kosecha den tur époka a konosé su ritualnan. Na Boneiru nan ta selebrá Simadan. Señor Eric La Croes ta un bon konosedó di e materia di seú i ta un persona ku a investigá profundamente kiko ta seú den tur su fasetanan. Durante e tayér aki señor La Croes lo konta entre otro kon seú a originá i kon tabata selebrá seú tur tempu tantu na Kòrsou komo na Boneiru. Lo e spliká tambe kon seú original ta i kiko seú bailá den kaya ta. Durante e anochi lo tin posibilidat pa hiba un diskushon habrí riba e tema aki, ku ta un parti históriko di nos kultura. Sentro Kultural Kòrsou pa medio di esaki ke invitá tur kulturistá i prinsipalmente lídernan di grupo di seu i partisipantenan den e marcha di seú pa partisipá na e tayér aki. Tur hende ta bon biní. Personanan ku ta deseá mas informashon tokante e workshop tokante Seú por tuma kontakto ku atministrashon di Sentro Kultural Kòrsou situá den Emmastad den oranan di mainta di 9’or pa 12’or di mèrdia, òf por yama telefòn 737-3510 òf 737-3682.