Den kuadro di su programa di formashon kultural i alabes en konekshon ku selebrashon di su 65 aña di eksistensia, riba djabièrnè 27 di febrüari próksimo, Sentro Kultural Kòrsou (CCC) ta organisá un interesante “Tayer di Steelpan” dirigí riba tur interesadó di músika di steelpan. E tayer ta kuminsá 7.00’or di anochi i lo tuma lugá den ouditorio di Sentro Kultural Kòrsou situá na Koninginelaan z/n den Emmastad. Meta di e tayer ta, pa duna informashon tokante entre otro historia di steelpan i kon ta trahá e instrumento musikal aki. Alabes lo tin demostrashon di varios tipo di steelpan. Despues di e presentashon lo klousurá e tayer ku un presentashon di “Curaçao Steelpan”, ku lo bai presentá e diferente klase di ritmo ku por toka riba un steelpan. E tayer lo ta na enkargo di señor Henri (Hennie ) Cornelia, ku alabes ta lider di e agrupashon Curaçao Steelpan. Na final di anochi lo tin un Happy Hour den Hòfi Kultural di CCC, kaminda por sigui  interkambiá di informashon tokante steelpan. Tur amante di kultura i músika en partikular ta bon biní. Entrada ta grátis, bebida i snèk ta na preis speshal.