Sentro Kultural Kòrsou pa kumpli ku su programa di formashon kultural, riba un base kontinuo ta organisá kursonan di Arte Visual i Pintamentu pa tantu mucha, hóben komo adulto. Pa komplementá e kursonan aki, un bia pa aña e ta organisá un eksposishon ku e diferete obranan ku su kursantenan a produsí. Den luna di yüli 2014 algun kursante bou di guia artístiko di su instruktor Morgaine Parris, a partisipá na un Tayér di Arte na e “Accademia del Giglio” na Florence, Italia. Komo resultado di e tayér aki, durante e periodo di 1 pa 6 di mart próksimo Sentro Kultural Kòrsou ta organisá un èksposishon ku obranan di e kursantenan aki, pa asina duna oportunidat na su kursantenan pa nan kompartí e èksperiensia ku nan a optené durante nan biahe. Esaki lo ta den forma di un presentashon i èksposishon di nan obra. Durante e eksposishon varios otro kursante tambe lo èksponé e obranan ku nan a krea durante e diferente kursonan. Na final di e èksposishon lo tin entrega di sertifikado na e kursantenen ku a kualifiká pa esaki. E èksposishon lo tuma lugá kuminsando djadumingu awor 1 di mart 2015 pa 5’or di atardi den e ouditorio di Sentro Kultural Kòrsou situá na Koninginnelaan den Emmastad. E èksposishon lo habri tur dia di 5’or di atardi pa 8’or di anochi i lo keda habrí te ku djabièrnè 6 di mart 2015. Klousura di e eksposishon lo ta djabièrnè 6 di mart 2015, 7’or dia anochi. Tur amante di Arte en partikular i di Kultura en general ta bon biní. Entrada ta grátis.