Djabièrnè 6 di mart último Sentro Kultural Kòrsou a klousurá su eksposishon di arte ku a keda organisá durante e periodo di djadumingu 1 pa djabièrnè 6 di mart. Ta trata di un eksposishon ku obranan di kursantenan ku a bai un mishon Florence, Italia, kaminda nan a partisipá na un tayér di Arte na e “Accademia del Giglio”. Durante di e diferente tayér e kursantenan por a sera konosí ku diferente téknika di pintamentu, ademas nan a haña e oportunidat di bishitá varios museo importante, kaminda nan por a mira obranan di artistanan grandi manera entre otro Michelangelo, Sandro Boticcelli, Giovanni Bellini, Lorenzo Ghiberti i otronan. E biahe aki a tuma lugá den luna di yüli 2014 i tabata bou di guía di señora Morgaine Parris, instruktor na Akademia di Arte di Sentro Kultura Kòrsou. Durante un presentashon hopi interesante e públiko presente por a haña un bunita bista di kon e biahe a tuma lugá i alabes apresiá e diferente obranan ku nan a eksponé komo resultado di nan biahe. Na klousura di e eksposishon presidente di Sentro Kultura Kòrosou señor Elvio Cijntje den kompania di señora Morgaine Parris a hasi entrega di sertifikado na e diferente kursantenan ku a kualifiká pa esaki. Personanan ku ta deseá mas informashon tokante e kurso di pintamentu por pasa na atministrashon di Sentro Kultural Kòrsou den oranan di mainta di 9’or pa 12’or di mèrdia, òf por yama telefòn 737-3510 òf 737-3682.