Durante e periodo 18 di febrüari te ku 13 di mei 2014 Sentro Kultural Kòrsou a organisá otro Kurso Historia Muzik di Kòrsou. E kurso tabata na enkargo di e konosido músiko, Henri (Harry) Moen i a keda tené den Sentro Kultural Kòrsou su fasilidatnan na Emmastad. Den e kurso aki ta trata  desaroyo di muzik tradishonal di Kòrsou i e kursantenan ta siña rekonosé ritmonan tradishonal, konhuntonan musikal,  kompositornan i otro desaroyo den muzik di Kòrsou. Meskos tambe nan ta siña aspektonan sosial i ekonómiko, ku tin relashon ku e desaroyo di muzik na Kòrsou. Na opinion di e 9 kursantenan ku a partisipá, e kurso tabata un éksito total i a yena un bashí na informashon tokante nos muzik serka nan. E forma úniko di duna lès di Harry Moen i su splikashon al kaso, kla i konsíso, a mantené un entusiasmo kontinuo serka e kursantenan. Riba djamars 13 di mei 2014, e kursantenan a risibí nan sertifikado for di man di Harry Moen i Elvio Cijntje, Presidente di Fundashon Sentro Kultural Kòrsou. Esnan ku a kalifiká pa nan sertifikado ta: Monique Gomes Casseres, Laureen Janzen, Angèle Martis, Bienvenido Miguel, Cesar Minguel, Diana Minguel, Guido La Pas, Arturo Petronilia i Lovely van Wetering. Sentro Kultural Kòrsou ta felisitá tur e pastisipantenan i nan dosente ku èksito di e kurso Personanan ku ta interesá pa partisipá na e kurso Historia di Muzik di Kòrsou, por tuma kontakto ku ofisina di Sentro Kultural Kòrsou situá den Emmastad di djaluna te ku djabièrnè durante ora di ofisina òf por yama e number di telefòn 737-3682.