Komo parti di su programa di formashon kultural i musikal, den luna di mart próksimo Sentro Kultural Kòrsou ta bai kuminsá ku lèsnan di muzík speshal pa penshonadonan 60-plussers. Si resientemente Sentro Kultural Kòrsou a lansa su proyekto “Promé Paso den Muzik”, ku ta un proyekto di edukashon musikal speshalmente pa enfoká riba muchanan den bario, awor den luna di mart próksimo, danki na inisiativa di Minister Jeanne-Marie Francisca, Minister di Desaroyo Sosial, Labor i Bienestar, nan ta bai kuminsá ku lèsnan speshal di muzik pa nos penshonadonan. Interesante di e proyekto aki ta, ku danki na e koperashondi Ministerio di  Desaroyo Sosial, Labor i Bienestar, tur 60-Plussers lo risibí un deskuento speshal riba e preis ku nan lo mester a paga normalmente pa sigui e lès di muzik. Ta bon konosí, ku den komunidat tin hopi penshonado ku tin e interes i deseo pa siña toka un instrumento musikal. Hopi biaha tin e pensamentu, ku un persona di un edat haltu ya no por siña toka un instrumento, pero realidat ta otro. Un persona di edat no solamente ta muchu mas motivá pa sigui toka un instrumento ku un persona mas yòn, ademas dor ku e persona tin hopi tempu disponibel, e por siña dominá e instrumento muchu mas lihé ku e mes ta pensa. Den su afan pa sirbi e grupo speshal aki, Sentro Kultural Kòrsou a logra di pone un programa hopi interesante den otro, ku ta akapará diferente tipo di instrumento musikal. Durante e kurso aki no solamente penshonadonan lo haña lès di muzik general i formashon musikal, kua ta enserá siña lesa noot, pero tambe nan ta siña konosé historia di muzik di Kòrsou, i mas importante ainda, nan ta siña toka un instrumento musikal di nan preferensha. Penshonadonan (60-plussers) ku ta interesá por skohe pa siña toka entre un di e siguiente instrumentonan musikal: piano, kitara, kuarta, basgitaar, drùms/perkushon, saksofon, blòkfluit, dwarsfluit i fió. E lèsnan ta ser duná den oranan di mainta den edifisio di Sentro Kultural Kòrsou na Koninginnelaan den Emmastad i ta na enkargo di dosentenan di Akademia di Músika Edgar Palm. E parti di historia di Muzík di Kòrsou ta wòrdu duná dor di e konosido músiko Henri (Harry) Moen. Personanan ku ta deseá mas informashon tokante e lèsnan di muzik speshal pa penshonado (60-plussers) por pasa na atministrashon di Sentro Kultural Kòrsou den oranan di mainta di 9’or pa 12’or di mèrdia, òf por yama telefòn 737-3510 òf 737-3682.