“Cuba i Mas” ta e eksposishon di kuadro ku Sentro Kultural Kòrsou a habri, den kua komunidat di Kòrsou por mira diferente kuadro ku kursantenan di su departamentu di Arte Visual (Pintamentu) a traha durante nan bishita na Cuba. Durante e periodo di 3 pa 9 di yüli último e grupo di kursante aki a partisipá na e konosido Festival del Caribe 2013 ku a tuma lugá na e siudat di Santiago di Cuba.  Durante nan bishita nan a partisipá na diferente tayer di Arte Mural tantu pa lokual ta trata e parti di teoria komo esun di práktika. Komo e parti di práktika bou di supervishon di artistanan Kubano, den grupo nan mester a pinta algun mural riba kanvas di un grandura di 4 meter pa 2.5 meter. Den e kuadronan e kursantenan a purba di trese e relashon entre Cuba i Kòrsou pa loke ta trata su hendenan, kultura, músika i arte. Mester bisa e kursantenan a logra nan meta tambe. Tur e kuadronan ta di un nivel hopi profeshonal akabá. “Nos ta hopi kontentu i orguyoso ku porfin nos por a hasi apertura di e eksposishon “Cuba i Mas”. E  eksposishon aki ta demostrá ku nos hubentut tin hopi potensial i ku nos tin hopi talento bou di nos hubentut. Nos ke enkurashá henter Kòrsou pa pasa wak e obranan aki i tambe e diferente otro trabounan ku nos kursantenan a traha. Ku beneplasito mi por bisa ku kada dia nan ta birando mas i mas profeshonal”, señor Elvio Cijntje, Presidente di Sentro Kultural Kòrsou a deklará. E eksposishon ta keda habrí te ku dia 29 di sèptèmber, entrada ta grátis. Apertura di e eksposishon a keda realisá dor di señor Rudsel Sophia den representashon di Ministerio di Enseñansa, Siensia, Kultura i Deporte. Un públiko basta grandi a hasi akto di presensia pa opservá tur e pinturanan. Entrada na e eksposishon ta grátis.