Sesentinuebe hóben a risibí nan sertifikado edukashon básiko den muzík

Resientemente Sentro Kultural Kòrsou a klousurá su proyekto “Promé Paso den Muzik”. Ta trata di un proyekto pa yuda desaroyá habilidat i talentonan musikal serka nos hóbennan den bario. Via di e proyekto aki hóbennan di entre 8 pa 14 aña di edat a haña e oportunidat, pa den grupo, gratuitamente risibí lès di formashon di muzik i alabes siña toka un instrumènt musikal. E proyekto tabatin un durashon di 2 aña i a konta ku partisipashon di hóbennan di bario di Barber, Soto, Tera Kora i Wishi/Marchena. Primeramente a partisipá 150 hóben na e proyekto aki, pero finalmente 69 a risibí nan sertifikado ku ta indiká ku nan a partisipá na e kursonan kompleto. Durante di e 2 añanan e hóbennan a haña primeramente teoria di músika, kon pa lesa noot, despues lès di blòkflùit, piano i nan eskoho di un instrumènt ku nan ta deseá. E instrumèntnan ku mas a keda skohé pa haña lès den dje ta: fio, saksofon, bas gitaar, kuarta, piano, kitara i drùms. Algu hóben a skohe pa haña lès di kanto.

E proyekto “Promé Paso den Muzik” tabata forma parti di e proyekto “Kinderen Maken Muziek”  di Hulanda i por a keda realisá danki na finansiamentu i koperashon di Skanfonds,  Oranje Fonds i Fonds voor Cultuurparticipatie di Hulanda i tambe na e gran koperashon finansiero di Ministerio di SOAW, Prins Bernard Fonds i UTS.

“Nos por mira bèk riba un eksitoso proyekto “Promé Paso den Muzik”. Estudionan a demostrá, ku muzik ta sostené tur proseso di edukashon i enseñansa i prinsipalmente serka nos hóbennan esaki ta un estímulo positivo pa nan dediká nan tempu den aktividatnan positivo. Ademas, muzik ta yuda stimulá konsentrashon, e ta krea disiplina i konfiansa propio i e ta fomentá un bon komunikashon alabes yuda desaroyá otro habilidatnan sosial serka nos hóbennan. Den kuadro di esaki nos di Sentro Kultural Kòrsou ta sumamente kontentu ku e resultado di e hóbennan ku a partisipá i tambe orguyoso ku nos por a fasilitá nos hóbennan den bario, ku pa un motibu òf otro nan no tabatin akseso na lèsnan di muzik, e posibilidat, pa nan por haña lès di muzik i siña toka un instrumènt”, señor Elvio Cijntje, Presidente di Sentro Kultural Kòrsou a deklará.