Willemstad, Teatro Luna Blou & La Tentashon ta moviendo den tur bario ku diferente proyektonan i presentashon nan. E wikènt aki djadumingu 16 ougùstùs lo tin presentashon di Hotèl La Tentashon na Tera Kòrá. E obra aki ta un produkshon di Teatro Luna Blou, La Tentashon i Luna Yen. E obra aki a nanse despues di e final di Luna Yen kaminda e hóbennan ku a partisipá i algun hóben di La Tentashon Performing Arts Academy a djòin pa asina traha riba e tremendo obra aki. Nan tabatin vários presentashon kaba, nan a presentá pa públiko general na la Tentashon, nan tabata di bishita na sentro di Bario Montaña luna pasa i djamars lastu ei nan a presentá dos biaha pa St. Jozef skol. Riba e dia ku a presentá pa St. Jozef e hóbennan a diskutí tokante e diferente temátika ku ta bin dilanti den e obra. E obra ta bai tokante un hotèl ku ta bayendo bankrut pa motibu ku tin sierto hendenan ta hasiendo un chake pa señora Clarinda, doño di e hotèl. Aki Superman, su subrino i algun trahadó ta deskubrí ken tur ta tras di e wega aki. Banco di Caribe, Refineria Isla, Gobièrnu di Kòrsou, Teatro Luna Blou, La Tentashon i Luna Yen ta invitá tur hende di Tera Kòrá i bisindario pa bin pasa un ratu agradabel na sentro di Bario Tera Kòrá. Lo bai tin presentashon di Hotèl La Tentashon pero promé ku e obra lo tin un presentashon chikí di La Tentashon Performing Arts Academy, nan lo presentá loke ku durante un siman largu nan a siña for di Sjaid Fonce.