Promé fase lo ta klá otro siman!

WILLEMSTAD:  Pronto bishitantenan di nos sentro di siudat lo por disfrutá di un café kombiná ku un konsepto nobo, na unda ku ta provoká tur e ‘sentidonan’ di e turista i ta brind’é un eksperensia nobo. Ya kaba por tuma nota di e rekonstrukshon na e parti dilanti di e edifisio ku ta situá nèt banda, di na unda ántes tabata Ackermans den Punda. E café ku lo wòrdu manehá pa Senior & Co. lo habri den su promé fase, dia 15 di yüli próksimo. Miéntras e di dos i último fase lo wòrdu kompletá den luna di òktober. The Blue Experience Café lo drai den forma di prueba riba dianan 15 pa 18 di yüli próksimo.

“Nos lo kuminsa duna bishitantenan lokal i internashonal un aperitif, di The Blue Experience. Tene kuenta ku esaki lo ta únikamente e promé fase…”, asina Ramon, Operational Manager di Senior & Co. a indiká.  E nòmber ta papia pa su mes, e café ta inspirá riba e mundialmente famoso Blue Liqueur. “Diariamente nos ta mira kon turistanan ta disfrutá di e likor durante di nan paseo ku guia na Landhuis Chobolobo. Ademas, nan ta fasiná ku e historia, orígen, proseso di produkshon i diferente otro detaye mas. Konsiderando e interes grandi di e bishitante, nos a bin riba e idea pa e proyekto aki.  Pronto, ademas di sinta i disfrutá di un dushi kòktel ku bista riba nos brùg Emma, bishitantenan di nos sentro di siudat lo por eksplorá tur nan sentidonan di un manera ku lo ta inolvidabel”.

Mas álue e Manager Operashonal di The Blue Experience ta komentá ku e proyekto aki ta un kontribushon na un sentro di siudat mas vibrante,  “E promé karakterístika di un empresario òf invershonista ta optimismo; i na Senior & Co. esei ta kore manera un liña kòrá den nos maneho. Ni ekonomia, ni Punda ta pasando den su mihó momentu, sinembargo ku e proyekto aki nos ke duna nos aporte na diferente sektor den e pilar ekonómiko. Turismo sigur ta un di nan. Nos sentro di siudat Willemstad ta un joya di bèrdat, i su edifisionan ku arkitektura kolonial den kolónan pastèl ta enkanto di tur bishitante. Nos ta kontentu di próksimamente por bai ofresé The Blue Experience!” E café lo ta habrí di djaluna pa djabièrnè for di 9’or di mainta pa 6’or di atardi i djasabra for di 10’or di mainta pa 5’or di atardi.  E orarionan menshoná ta spesífikamente pa e dianan di prueba.