Willemstad, Djabièrnè 14 di novèmber a tuma lugá e Semi Final di Luna Yen kaminda 11 finalista a kompetí pa nan pasa pa e Gran Final. Esaki a tuma lugá na La Tentashon. Durante e Semi Final di Luna Yen e hóbennan ku a partisipá na e diferente barionan di Luna Yen den Bario (Wishi/Marchena, Sta. Maria, Barber, Punda/Steenrijk, Sta. Rosa i Boka Sami) a duna e huradonan un trabou sumamente difísil. E finalista nan a duna un tremendo presentashon. No por keda sin menshoná ku e nivel di presentashonnan tambe tabata na un nivel hopi haltu. Esaki ta demonstrá ku nos yunan di tera tambe tin hopi talento. Riba esenario a tuma lugá presentashon di kanto, baile i aktuashon. Na final di e anochi tabata tin 6 finalista ku a klasifiká pa e Gran Final. Esakinan tabata: Bario Wishi/Marchena: Zaerick Martha (Poesia) Bario Sta. Maria : Melissa Chirinos,Raymick & Rayzahna Martha(Baile) i Shanuska Schoop (Rap) Bario Barber: Grupo Ken a Mandabu (Aktuashon) Giheny Jamanica, Azaria Plaate, Gedion Kook, Gurtson Hooi & Shasien Wolf Bario Punda: Grupo SAG (Aktuashon) Shaeedy Aniceta, Michelle Kunst, Andres Herrera, Daymaris La Cruz Bario Boka Sami: Gedion Kook & Christopher Damiana (Aktuashon) Awor e finalista nan ku a klasifiká huntu ku e ganadónan di kada bario lo bai kuminsá nan preparashonnan pa e Gran Final kual lo tuma lugá di 6 di desèmber 8or di anochi na La Tentashon. E edishon di Luna Yen 2014 a wòrdu hasi posibel dor di Banco di Caribe, Ennia, Refineria Isla, Coca Cola, Auto City, Gobièrnu di Kòrsou, Teatro Luna Blou & La Tentashon. Pa mas informashon bishita nos página wep: www.lunablou.com. Tambe por yama Teatro Luna Blou na 462-2209 òf bishita nos Facebook Page: Teatro Luna Blou & La Tentashon.