Debí na un kresemente enorme den e kantidat di kas den algun bario, Selikor mester modifiká 6 ruta di rekohé shushi di kas di e total di 85. Ta trata akí di e siguiente rutanan: Brievengat Bieu, Brievengat Nobo, Mahaai, Cas Cora, Dominguito/Harbour View i Dominguito/Bottelier. Tur e rutanan akí entrante 1 di dezèmber lo pasa strukturalmente pa e dia siguiente di kua nan ta programá riba e skema ofisial.

Manera ta konosí pa algun tempu kaba sierto barionan aki na Kòrsou a konosé un kresementu den kantidat di bibienda. Pa e motibu akí Selikor NV a bin ta studia e posibilidat pa trese kambio den algun di su rutanan fiho pa rekohé shushi di kas di forma ku por halsa e grado di kumplimentu riba e dia palabrá.

Den e simannan tras di lomba Selikor a hasi e pruebanan nesesario pa definí kon e rutanan lo por bai kana di forma mas optimal i efisiente. Resultado di e pruebanan akí ta ku den algun bario mester a skèdjel e rutanan pa su siguiente dia, pues 1 dia mas lat. Pa fin di luna di novèmber lo finalisá e periodo di prueba i e kambionan lo bira definitivo i drenta na vigor ofisialmente entrante promé di dezèmber.

Konkretamente esaki ta nifiká ku bario di Brievengat Bieu i Brievengat Nobo lo bini na bùrt awor riba djamars. Habitantenan di Mahaai i Cas Cora lo risibí servisio riba djarason. Den bario di Dominguito/Harbour View i Dominguito/Bottelier Selikor lo bai pasa awor riba djaweps. Tur sobra bario lo keda mantené riba nan dia, segun e skema eksistente.

Nos ta pidi nos diskulpa pa kualkier inkonbenensia ku e kambionan akí por trese kuné i ta duna garantia ku e kambionan ta nesesario pa sirbi nos klientenan mihó. Selikor ta pidi habitantenan di e barionan konserní tuma bon nota di e kambionan akí.