Resultado anual 2012
Mirando bèk riba e desaroyonan i aktividatnan ku a tuma lugá den aña 2012 nos por konkluí un bes mas ku, meskos ku añanan anterior, aña 2012 pa Selikor NV tabata un aña progresivo.  Konforme su metanan statutario, Selikor NV den aña 2012 tabata sumamente aktivo riba e tereno di maneho di limpiesa. Meskos ku añanan anterior, Selikor a desplegá aktividatnan di prevenshon, rekohementu, transporte, resiklahe i prosesamentu di shushi. Selikor a hasi e invershonnan nesesario den ekiponan speshal i medionan pa mantené i te asta alsa kalidat i efisiensia den e maneho operashonal.  A atkerí dos trùk di shushi pa rekohé shushi di kompania, un trùk di “kölkenzuiger” pa hasi trabounan di mantenshon di kloaka i dos trèker pa reforsá e servisionan komersial.  Esaki tabata un invershon tantu pa remplasá vehíkulonan eksistente komo pa amplia e kapasidat di e servisio aki pa kua e demanda ta kresiente. Durante e aña 2012, tambe a hasi mantenshon i reparashon na instalashonnan i otro material di trabou pa subi efisiensia den ehekushon di tarea i optimalisá uso di medionan i materialnan disponibel. Den 2012 a sigui desaroyá e instrumento ku Selikor NV ta usa pa trese su resultadonan den bista i guia e resultadonan na tempu den e direkshon deseá.  Selikor a hiba un maneho finansiero estrikto i rigides den atministrashon di gastunan. Selikor a konosé un kresementu di entrada i e kompania a generá den aña 2012 un resultado empresarial positivo di 1.9 mion florin.

Maneho di limpiesa

Banda di rekohé shushi, Selikor tin komo un di su tareanan prinsipal pa hasi limpiesa den bario i pa eliminá sitionan ku ta deshasí shushi ilegal. Selikor ta hasi esaki riba un base regular, trahando riba e parti preventivo komo tambe esun represivo. Ta parse ku tur e esfuerso aki no ta sufisiente. Na diferente área konstantemente nos ta mira ku ainda tin hopi shushi visual i sitionan kaminda ta deshasí di shushi ilegal. Nos mester pone énfasis ku si nos mes komo habitante no ta sinti nos yamá pa yuda mantené nos isla limpi, ta sumamente difísil pa nos por biba riba un isla liber di shushedat. Si nos ta konsiderá ku e pais aki ta di nos, nos tin e responsabilidat patriótiko i síviko pa mantené limpi. Bentamentu di shushi riba áreanan no destiná pa esaki, ta hasi daño na nos medioambiente. Den e luna di ougùstùs Selikor a repartí su korant anual ‘Garoshi’ pa tur habitante. Den e korant aki tin diferente informashon kon pa atendé ku shushi di un forma responsabel. Un invitashon ta bai na tur habitante pa apliká e tepnan. Selikor ta pidi komunidat den su totalidat pa yuda nos mantené Kòrsou limpi pasombra ta HUNTU só nos por logr’é.

Flota di trùk nobo

Resientemente Selikor a risibí kuater trùk di shushi nobo pa fortifiká e flota di trùk i optimalisá e servisio di rekohé shushi di kas. E personal ku lo bai kore i drecha e trùknan aki, ya a risibí e instrukshonnan nesesario serka representantenan di e kompania ku ta traha e trùknan ku tabata di bishita na Kòrsou for di Italia. E trùknan ta di marka IVECO/COS.ECO., ku internashonalmente ta konosí komo un fabrikante di trùk i otro ekiponan pisá di kalidat superior i ku ta sertifiká pa ISO. Atkisishon di e trùknan nobo lo eliminá retrasonan den e skema di rekohé shushi debí na fayonan den ekipo. Di e forma aki Selikor lo sigui brinda e servisio riba un kalidat haltu ku komunidat a bin ta kustumbrá di dje. Un biaha mas Selikor ta gradesí komunidat den su totalidat pa nan pasenshi i komprenshon i ta sigui traha duru pa duna servisio sin interupshon.  Un danki tambe na e personal di Selikor kompletu ku ta laborá tur dia di nobo hasiendo nan máksimo esfuerso pa rekohé tur kònteiner un bes pa siman na tur kas riba nos isla.

Sèptèmber luna di limpiesa

Ya a bira un tradishon kaba ku tur aña di nobo, Fundashon Kòrsou Limpi Bunita huntu ku Selikor ta pone lus riba e luna di sèptèmber, luna di limpiesa. Durante e luna aki lo bai sigui pone hopi énfasis riba e aspekto di limpiesa. Lo bai tin diferente aktividatnan dirigí riba tur gremio den nos komunidat. FKLB lo presentá un programa amplio di tur e aktividatnan durante e luna di limpiesa. Ta e intenshon pa nos komunidat konstantemente ta den akshon dor di saka potrèt riba diferente senarionan di limpiesa, ku e chèns pa diferente premio atraktivo. Pa loke ta trata e aspekto di resiklahe, lo bai sigui stimulá i motivá komunidat pa spar i trese materialnan separá na nos kaya di medioambiente ku e meta pa resiklá. Komunidat lo bai sigui risibí mas informashon i detaye di tur e kampañanan menshoná riba e página di facebook di Selikor i FKLB. Tambe via di e wèpsait di www.selikor.com i www.fklb.org. Keda pendiente pa mas informashon!