Selikor ta logra mantené sertifikado di ISO 9001 ku ISO 14001 pa di 14 biaha. Tur esaki ta posibel dor di e forma konsistente ku Selikor a bin ta hiba su maneho segun normanan stipulá di ISO 9000 i ISO 14001. E sistema di ISO ta perkurá pa Selikor tin un instrumento ku ta garantisá ku tur aktividat di Selikor ta keda realisá na un nivel di kalidat ku ta kumpli ku loke e kliente ta spera di nos i teniendo semper kuenta pa no hasi daño na nos medioambiente konforme palabrashon hasí. E kompania Hulandes BSI, representá pa sr. Piet Coevert i sr. Ali Yeganeh a ouditá e sistema di Selikor riba maneho di kalidat i di medioambiente. Konklushon di e ouditorio ta ku Selikor a logra mantené un nivel aseptabel di kalidat di servisio i atenshon pa medioambiente. Durante di e ouditoria a rekonosé ku e forma ku Selikor ta registrá su prestashon ta bon hinká den otro. Naturalmente tambe a bin dilanti durante e ouditoria algun aspekto operashonal ku mester di mas atenshon. Tur esaki ku un bista riba mehorashon kontinuo. Pa 2015 lo bai midi si tin adelanto den nos presentashon riba e puntonan di mehorashon ku BSI a indiká. Selikor ta kontentu ku e logro aki i ta gradisí komunidat pa e sosten i konfiansa brinda na Selikor durante aña 2014.