Den siman di 14 di sèptèmber Selikor a duna inisio na e proyekto di registrashon digital di  kònteiner serka klientenan komersial di Selikor. E proyekto ta konsistí di suministrá tur kònteiner registrá riba nòmber di un kompania ku Selikor tin un kontrakt kuné ku un chip i un steker.

Dikon e chip i steker aki?

Ku introdukshon di un chip i un steker riba e kònteiner, Selikor ta digitalisá su sistema di registrashon. Kada kònteiner ta wòrdu registrá bou di un number digital. E sistema aki ta brinda e fasilidat di informashon di e kontrato ku e kompania tin ku Selikor pa loke ta trata rekohementu di shushi di tur kompania.

E trayekto aki lo tin un durashon di 3 luna. Durante e temporada aki Selikor lo pasa na tur kliente komersial, pues kompania òf organisashonnan ku tin kontrato ku Selikor i ku ta disponé di un òf mas kònteiner. Un representante di Selikor debidamente identifiká i uniformá lo pasa na e kompania pa pone e chip i e steker riba e kònteiner(nan) ku tin registrá riba nòmber di e kompania en kuestion. Durante e bishita aki tambe e kolaboradó lo kontrolá e estado di e kònteiner(nan), kaminda ta nesesario, e kolaboradó lo indiká esaki i despues hasi e eventual kambionan.

Selikor ta pidi koperashon di tur su klientenan komersial pa brinda e kolaboradó akseso na e kònteiner pa por fasilitá e trabounan rekerí i finalisá e trayekto di registrashon aki den e tempu stipulá.

Bo kompania òf organisashon por risibí bishita di e representante di Selikor di djaluna pa djabièrnè entre 8or di mainta pa 5or di atardi. Pa informashon adishonal por tuma kontakto na 46LIPMI (465-4674) òf via info@selikor.com.