Selikor lo inisiá ku e trabounan di limpiesa riba kamindanan prinsipal i den barionan. Gobièrnu di Kòrsou a pone e fondonan nesesario disponibel den kuadro di e kampaña pa eliminá fokonan di sangura ku ta kousa entre otro e malesa di Zika. Kuminsando den e luna di yüli te ku fin di novèmber, Selikor lo hasi limpiesa den tur bario. Públiko lo por ripará trabounan di limpiesa den e barionan ku ta na turno. Lo bai repartí e trabounan di limpiesa den fase pa kubri Kòrsou kompleto.

E trabounan ta enserá ku lo kòrta yerba i rama di palu te na kurá di kas, lo bari tur tera riba kaminda públiko, rant di kaminda i na krusadanan prinsipal. Tambe tur rama di palu ku ta tira riba kaminda públiko, ku ta kologá bou di 4 meter di haltura, lo keda kòrtá. Banda di esakinan lo piki tur shushi visual manera, papel, karton, saku di plèstik, bleki, bòter i tur otro material ku no ta pertenesé kantu di kaminda. Pa loke ta trata áreanan manera bòrchi di bus, esakinan tambe lo risibí e atenshon nesesario pa e áreanan akí tambe keda limpi.

E trabounan di limpiesa lo keda ehersé dor di algun kontratista, kende nan lo bai involukrá entre otro habitantenan di e bario. Personanan ku ta interesá, sigur nos hóbennan, pa bini na remarke pa un trabou di limpiesa por tuma kontakto ku Unidat di Bario ku sra. Rivera òf sra. Constancia na telefòn

888- 2110. Unidat di bario lo kordiná un ke otro.

Selikor ta pidi kolaborashon di públiko pa na momento ku tin trabounan di limpiesa den bario no saka shushi di kurá ni potoshi pone pafó di kurá pa loko i kita opstákulonan ku por stroba e trabou por ehèmpel outo. Un apelashon ta bai na tur habitante pa mantené nan mes na e skema pa rekohé potoshi un biaha pa luna grátis. Riba e fechanan stipulá riba e skema por saka potoshi pone pafó di kurá, segun regla, pa asina Selikor por bai ku esaki. Ademas por yama na 46-limpi (465-4674) i asina indiká na kua adrès a pone potoshi pafó di kurá.

Banda di e trabounan di limpiesa, Selikor NV huntu ku Fundashon Kòrsou Limpi i Bunita (FKLB) den kombinashon ku e organisashonnan di bario lo bai organisá enkuentronan informativo den e diferente barionan bou di e proyekto ku ta karga e nòmber di Stènki Busters. E intenshon ta pa nos habitantenan realisá e importansha i nesesidat pa nan mes yuda mantené nan bario limpi. Lo enfatisá esaki komo un responsabilidat síviko ku nos kada un tin ku nos pais.

Selikor ta pidi tur habitante pa despues di e trabounan di limpiesa mantené e área rondó di nan kas limpi. Si nos kada un hasi esaki nos por garantisá un Kòrsou limpi manera nos ke. Selikor ta konta ku un i tur su kolaborashon pa di e forma akí yuda mantené Kòrsou liber di shushi. Ta huntu nos ta logr’e.