Selikor NV ta partisipá, ku debí na sirkunstanshanan fuera di nos alkanse, ta eksperensiando algun retraso den e skema di rekohé shushi di kas. Konsekuensia di esaki ta ku tin algun bario ku ainda no a haña servisio riba e dia kustumbrá. Apesar ku tin un retraso e siman akí, Selikor NV ta hasiendo lo máksimo pa tur ruta di kas keda rekohé e siman aki mes.

Awe mainta a sali pa bai rekohé algun ruta djamars i djarason ku no a alkansá yega, ku énfasis riba e barionan ku siman pasá a keda atras. Pa awe tardi lo drenta algun bario di e ruta di djaweps i pa mañan djabièrnè ta e intenshon pa konkluí ku e rutanan di djaweps. Pa loke ta trata e rutanan di djabièrnè, Selikor lo rekohé e shushinan entre djabièrnè mes i pa konkluí ku esakinan riba djasabra.

Ta e intenshon pa no laga ningun bario keda ku nan shushi pa fin di siman. E personal lo traha fin di siman riba djasabra i djadumingu pa finalisá e skema atrasá. Habitantenan ku tuma nota ku Selikor a pasa den nan bario pero no a bai ku nan shushi di kas, por tuma kontakto ku nos departamentu di Servisio na Kliente na 434-1300.

Nos ta konsiente ku e situashon aktual ta inkómodo pa kada habitante ku sigur ta eksperensiá ekseso di shushi dilanti di nan kas. Selikor ta keda komprometé pa kumpli ku nos responsabilidat riba nos maneho di shushi. Nos ta pidi nos diskulpa pa eventual molèster ku e retraso akí por a okashoná.