Djamars, 15 di òktober 2014 e tim di kalamidat di Selikor a simulá un senario kaminda tur personal inkluso klientenan ku tabata den edifisio mester a evakuá e edifisio. E simulashon aki ta unu ku tur aña di nobo ta tuma lugá. Esaki kada bes ta sirbi komo un treinen kon mester aktua den kaso di un kalamidat. E proseso pa atendé ku kalamidat ta definí i akordá dor di brantwer. Kada miembro di e tim di kalamidat sa kiko ta nan ròl den kaso ku algu presentá. E ehersisio aki ta den kuadro di e plan di seguridat ku Selikor ta apliká. Bou di guia di profeshonalnan riba e tereno di seguridat huntu ku e tim di kalamidat di Selikor mes a dirigí henter e proseso i duna tur instrukshon nesesario na koleganan i klientenan ku tabata den edifisio na e momento konserní. E resultado di e simulashon a konkluí despues di a logra saka tur hende for di edifisio den un tempu rekòrt pa despues e tim di kalamidat evaluá kon e proseso a kana.