Nos ta drentando kulminashon di e temporada di karnaval 2019. Pa e temporada akí Selikor, un biaha mas ta trese e mensahe: T’asina ta hende, ku e meta pa sigui motivá i eduká nos komunidat riba importansia di limpiesa. Ku e mensahe akí, Selikor ke yama atenshon di tur karnavalista riba un bon komportashon durante i despues di karnaval. 

E mensahe: t’asina ta hende, su énfasis ta riba un bon komportashon den tur sentido. Tantu e forma kon nos ta para na kantu i apresiá nos gruponan di karnaval, nos aktitut positivo i prinsipalmente e forma kon nos ta atendé ku nos shushi. T’asina ta hende, e karnavalista ku ta forma parti di un grupo di karnaval ta baila, gosa i disfrutá lagando nos kayanan limpi i bunita.

T’asina ta hende, ta É HENDE ku bon intenshon. E hende ku sa di komportá su mes responsabel, e ta aktua korekto i ku rèspèt pa otro. E hende ku ta atendé ku shushi di un forma responsabel. Ban yama ayó na tira shushi abou pa loko, tene kuenta ku otro i disfrutá di un dushi karnaval.

Durante e marchanan nos tur huntu ta baila bai pariba yen di alegria. Despues di kada marcha di karnaval ta sigui e marcha di limpiesa, laga nos duna espasio na e personal di Selikor i fasilitá nan trabou. Pa esnan ku tin stelashi, purba na saka e shushinan ku keda abou.

Selikor ta hasi un apelashon na tur nos karnavalistanan pa sali kas ku bo saku di shushi i hasi bon uso di dje i asina mantené nos kayanan limpi i bunita. Si nos ke nos por i nos kada un por ta ehèmpel pa otro dor di tira shushi den saku di shushi, pasó t’asina ta hende!

Felis karnaval 2019!