Aña 2020, a bira e di 20 aña konsekutivo ku Selikor ta pasa dor di un ouditoria di ISO i ta finalisá esaki di forma eksitoso. Durante 19 pa 22 di òktober, e kompania hulandes BSI, representá pa sr. Barry Borst a ouditá Selikor NV riba e maneho di kalidat i medioambiente segun e normanan ISO 9000-2015 i 14001-2015.

Meskos ku pa hopi kompania, pa Selikor tambe ta un reto pa hiba un maneho diario adaptá na e normal nobo debí na e pandemia di Covid-19. Durante di e ouditoria BSI a rekonosé ku, apesar di esaki, Selikor a sa atendé di forma diligente pa trata na surpasá e retonan akí. Mas aleu BSI por a konstatá ku usando e konosementu amplio den maneho di shushi i ku koperashon di e personal, Selikor a logra introdusí diferente kambio den e organisashon pa hasi e kompania resistente na efektonan di e pandemia. Tur esakinan a kontribuí ku Selikor a logra mantené tantu e sertifikado riba maneho di kalidat komo di medioambiente.

Selikor ta kontentu ku e logro aki i ta gradisí komunidat pa e sosten i konfiansa brindá na Selikor durante aña 2020.