Ku donashon di weganan di feria di Rotary Curaçao i CocaCola komo e refresko ofisial

Willemstad – Den kuadro di Dia Internashonal di Bestia Fundashon Parke Tropikal a bin ku un idea pa organisá un Siman Bestial ku e meta pa rekouda fondo. Despues di e eksitoso Zoohunt di wikènt pasa, Parke Tropikal ta preparando pa kulminashon di Siman Bestial ku e tremendo aktividat “Fun & Family Day at the Zoo” e wikènt aki. Parke Tropikal ta hopi kontentu ku tantu CocaCola komo Rotary Curaçao, vbanda di hopi otro sponser a kere den e proyektonan aki i a bira AMIGU di Parke Tropikal. Rotary Curaçao resientemente a hasi un gesto masha bunita i a regala Parke Tropikal weganan di feria. E weganan di feria aki a keda usa durante di e famoso Feria Rotaria. Ta un gesto ku direktiva di e Fundashon Parke Tropikal i miembronan di Komishon Bestial ta apresiá inmensamente. Parke Tropikal a drecha mayoria i duna nan un bida i uso nobo. Ta weganan ku parke lo kuida masha bon i alabes hasi bon uso di dje den futuro tambe. Ku e bunita donashon aki di Rotary Curaçao, Parke Troikal lo hasi hopi mucha di Korsou kontentu. Lo estrena mayoria di e weganan e wikent aki durante Fun & Family Day at the Zoo. CocaCola tambe a bira amigu di Parke Tropikal i awor ta e refresko ofisial. Bishitantenan di Parke Tropikal pa e aktividat di Fun & Family Day at the Zoo por ta sigur ku e Zoobar ta bon surti ku produktonan di Coca Cola, Fria, Fuze Tea i Minute Maid. Fun & Family Day at the Zoo ta tuma lugá dia 4 i 5 di òktober di 10 or di mainta pa 5 or di atardi. Entrada pa grátis. Lo bai tin rekorido interesante den parke pa nos muchanan. Hopi wega di feria ku premionan masha atraktivo. Chang’e porko, hala lechi, lasso the bull, kop van jut, dr. bibber ta entre otro algún di e weganan super dushi ku lo tin e dianan aki. Un ‘foodcourt’ ku masha hopi kos di kome i di bebe. Entretenimientu i hopi mas. Por hasi donashon di material di enrikesimentu pa e bestianan manera palèt, kabuya, klok, bèl, pero tambe di sèn. Maduro & Curiel’s Bank ta soru pa tin mashin di swipe pa fasilitá tur bishitante ku ke kumpra un artíkulo na Zootique, e giftshop, King Cash of hasi un donashon na parke. Fun Miles tambe a pone mashin disponibel ku bo por troka bo Miles nan pa artíkulo of hasi donashon. Durante di e dos dianan di feria lo tin alrededor di 200 boluntario ku ta yuda den diferente forma i area. Bishita Fun & Family Day at the Zoo e wikent aki djasabra 4 i djadumingu 5 di oktober di 10 or di mainta pa 5 or di atardi i selebra Dia Internashonal di Bestia huntu ku Fundashon Parke Tropikal. Entrada pa e parke ta gratis. Pa mas informashon di Fun & Family Day at the Zoo jama 736 0188 of wak e facebook page di Parke Tropikal.