WILLEMSTAD: Awe, djaluna 21 di mei ta selebrá un dia históriko pa e famia grandi di Banco di Caribe. Riba 21 di mei 1973 a habri portanan di e promé branch di Banco di Caribe, na Handelskade. Awendia, Banco di Caribe ta konta ku 267 empleado i 5 branch na Kòrsou. Total, Banco di Caribe tin 373 empleado repartí riba 4 isla. Banco di Caribe a demostrá di ta un banko ku vishon! E aña aki a prepará den grandi; e tim di maneho di Banco di Caribe lo tei for di 9’or di mainta riba e sitio di parkeo na edifisio prinsipal riba Schottegatweg pa gradisí nos komunidat pa e konfiansa brindá.

Klientenan i komunidat di Kòrsou ta wòrdu invitá pa e tradishonal salú ku bolo. Parti mainta Cafe Barista lo repartí kòfi, te, chukulati i Nini’s Johnny Cake. Lo tin animashon di Norman Moron Trio. Parti mèrdia lo tin algu pa sisti e stoma i lo repartí pasaboka di trùknan di pan Kòki Riba Blòki i Hot Pepper miéntras tin animashon di Grupo Kompèr i Dj RO-1. E selebrashon públiko ta terminá 3’or di mèrdia.