WILLEMSTAD.- Backstage Promotions ku ta enkargá ku produkshon i selebrashon di e programa ‘Glamur, Farándula, Moda i Beyesa’ ta bai selebrá 15 aña di Glamur ku e konsierto ‘Pasku Glamuroso’.
ARTISTANAN LOKAL
Nos artistanan lokal lo bria durante dje konsierto. Jill Frans lo ta presentando su kansionnan di Pasku poniendo énfasis riba kansionnan na ingles. Otro dje kantantenan ku lo presentá su repertorio amplio di kansionnan di Pasku i melodianan varia ta Melania van der Veen. Por último Ced Ride, kende ta selebrando 55 aña den farándula lo presentá su klásikonan di Pasku.
NANCY RAMOS
E legendario kantante di kansionnan di Pasku di dékada 70 i 80, Nancy Ramos lo ta pa promé biaha den un show di Pasku aki na Kòrsou. Nancy lo presentá ku su propio orkesta i interpretá su klásikonan di Pasku.
MODA I BEYESA
Un show di moda i beyesa tambe lo forma parti di espektákulo ku lo tuma lugá dia 13 di desèmber próksimo den e sala di eksibishon di World Trade Center Curaçao. ‘Pasku Glamuroso’ lo ta un konsierto ku lo hinkabu den ambiente di Pasku mirando ku for di entrada lo bo keda risibí ku músika di Gaita. For di 7’or di anochi ora ku porta habri Gaita lo kuminsá zona i pa 8’or e show lo kuminsá den sala di eksibishon di WTC.
KARCHI
Karchi pa sekshon general ta kosta 75 florin i ta optenibel na Tik Tak, Beep Beep, Mensing’s Caminada i na Koko Loko Gosieweg. Karchi pa sekshon di VIP ta kosta 150 florin. Na entrada lo bo keda risibí ku un ‘wèlkòm drink’. Entrada VIP ta inkluí, bibida, snek i bo ta sinta na mesa. Pa reservashon di bo karchi di VIP bo mester yama 524-8838 i bo karchi lo keda entrega te serka bo.
GIMMICK
Djadumingu awor, di 10’or di mainta pa 2’or di mèrdia lo tin un oferta spesial pa karchi general di ‘Un Pasku Glamuroso’. Lo bende e karchi general na 50 florin, pues 25 florin di deskuento na Koko Loko Gosieweg. Sali Misa pasa i kumpra bo karchi na preis spesial. 
Bin disfrutá di ‘Un Pasku Glamuroso’, un konsierto ku nos mihó artista nan lokal i Nancy Ramos direktamente fo’i Venezuela. Un anochi di Gala pa selebrá 15 aña di ‘Glamur, Farándula, Moda i Beyesa’.