WILLEMSTAD – En kuadro di un okashon uniko, ayera atardi pa di prome biaha a tene e konferensha di prensa di e evento ‘’Selebrá Bida’’ aya den kapia, na Morada Santa na Bottelier. Aña 2014 ta marka un temporada sumamente significante pa El Tributo, Extura i Entiero Na Kuota. Operando den e sector funeraria, tur e kompanianan ta kumpli nan di 70, 40 i 25 aniversario e aña aki. Naturalmente esaki ta motibu pa selebrá i na mes momentu un bon oportunidad pa yama pueblo di Kòrsou danki pa e konfiansa duná  durante tur e añanan. El Tributo, Extura i Entiero Na Kuota a uni forsa i lo organisá un evento kaminda e meta prinsipal ta pa refleha, inspirá i motiva kada unu presente. Djasabra 15 di mart di 19:00 pa 22:00 Brionplein lo ta esenario pa un evento masha spesial kaminda nos lidernan spiritual lo dirigí palabranan di motivashon i inspirashon pa e pueblo di Kòrsou. E evento aki ta sirbi pa konsientisashon den tur aspekto di bida, kual morto tambe ta forma parti di dje. Ta importante pa kada individuo para ketu, pensa i reflehá riba su bida. Nos tur tin di muri un dia, esei ta nos destino komun. Pero e manera kon kada un di nos ta biba i selebra nos bida ta un eskoho personal i uniko. Den e kuadro aki tambe ta lansá e kampaña di ‘’Konfeshon di Kurason’’ kaminda kada un persona den un forma anónimo por komparti nan  pensamentu, deseo of konfeshon, den un di e ‘’booth’’ spesialmente diseñá p’e okashon aki. E kampaña di Konfeshon di Kurason lo dura durante henter e temporada di kuaresma, i durante e periodo aki e boothnan lo ta disponibel na puntonan strategiko pa por hasi uso di nan. Nataly Antonia i DJ NRG lo anima, i varios artista renombrá manera Shamiro Anita, Melania van der Veen, Merietza Haakmat i Levi Silvanie, lo wordú akompaña pa Dennis Aalse i su orkesta  pa duna e evento un ambiente alegre i festivo. Bishita e pagina di El Tributo i Extura riba Facebook pa mas informashon Un i tur ta keda kordialmente invitá pa bin Selebrá Bida i enrikese alma i kurason!