Willemstad – yüni 2015: Señor Urayn Cranston ta e di dos ganadó den e temporada nobo di e gameshow Bai’e na Telecuraçao. Den kompania di algún miembro di famia el a risibí su Kia Picanto nobo nobo i un seguro di outo grátis di ENNIA. Entrega di e yabinan di outo a tuma lugá di un manera hopi prèt, ku kibramentu di un piñata. Meimei di tur e regalitonan, e ganadó a piska yabinan di e outo.

Señor Cranston ta un kliente di TDS. Banda di un outo i un seguro di outo grátis, e felis ganadó a haña tambe un aña largu abono grátis riba TDS. E kompania di televishon e aña akí ta selebrá 30 aña, loke a pone ku djamars último ei tabatin dòbel fiesta. ENNIA ta felisitá tantu señor Cranston komo TDS.

E edishon di Bai’e aki tambe tabata eksitante pa wak. Un di e partisipantenan a gana e asina yamá Bai’e tur tur, loke a nifiká ku e partisipante a haña èktra yabi. Pero, e partisipante akí no a logra start e outo. Durante e último rònt e tenshon a bira muchu pa señor Cranston, pesei el a kai sinta abou pa warda su turno. Pa su sorpresa ora el a drai e yabi el a resultá e felis ganadó di e outo, un Kia Picanto 2016 i tambe un aña largu di seguro di outo grátis di ENNIA.

Klientenan privá di ENNIA ku ke partisipá den Bai’e, por inskribí via www.ennia.com. Klientenan ku ta risibí un pago di penshun di ENNIA outomátikamente ta kompetí pa partisipashon den e programa. Tur luna ta tene un rifa pa skohe partisipante. Ademas e ganadó ta haña un aña largu seguro di outo grátis di ENNIA.

Riba potrèt: Junny Duggins, Accountmanager Broker Support di ENNIA, e ganadó Urayn Cranston i Manuel de Gouveia, Sales and Marketing Supervisor di TDS durante entrega di e chèk simbóliko.