WILLEMSTAD.- Durante di e mèrdia i anochi di premiashon Multi Event Organization a hasi entrega di premionan na e respektivo ganadónan di Karnaval 2015. Di un forma simbóliko e premio di plaka efektivo a keda entrega pa medio di un ènvelòp. E representante di kontabilidat di MEO riba kada ènvelòp a skibi e suma ku esun premia ta gana. E hecho ku a hasi uso di un ènvelòp den kua no a enserá e chek korespondiente na e montante skibi riba dje ta simplemente pa sigui reglanan estrikto di kontabilidat (impuesto). Reglanan di kontabilidat ta enserá lo siguiente: 1. No por traha niun chek na ‘toonder’; 2. Kada grupo òf persona ku risibí chek tin ku firma un komprobante ku ela risibí su chek, riba kua tin su nòmber, e propósito ku ela risibí e chek pe i e identifikashon; 3. No ta traha chek pa niun menor di edat, apesar dje hecho ku nan por ta nominá pa kualke representashon. Durante dje anochi e maestro di seremonia na vários okashon a mustra riba esaki evitando ku esaki lo krea konfushon. MEO komo organisashon responsabel ta sigui tur reglanan di kontabilidat stipulá pa asin’aki por hasi su kuenta final manera debe ser.