17 febrüari a entregá proposishon bon dokumentá

WILLEMSTAD – Securitas BV ku orguyo ta drenta den un koperashon eksklusivo ku Flowbird Urban Intelligence i asina partisipá na e destaho públiko ku Gobièrnu a emití pa maneho pa parkér den sentro di siudat. Di e forma ei Securitas den kurso di tempu ta hiba Punda i Otrobanda na un desaroyo igual na siudatnan grandi rònt mundu ku fasilidatnan na nivel pa parkér i otro servisio útil.

Pa e outomobilista ku aworó ke stashoná den sentro di siudat esaki ta nifiká na promé lugá ku esei ta bai a base di e plachi di number di outo; ke men, no tin nodi mas laga un papel den outo. E método di pago ta mas fásil usando e app di Flowbird pa telefon selular, ku por download den Apple Store òf Google Play. Despues di instal’é, fásilmente ta paga ku credit òf debit card, i un biaha so mester inkluí e plachi di number di e outo. Despues di stashoná e outo, ta skohe orario i durashon di parkér, primi start i tur kos ta reglá. No solamente esaki ta un método sigur pa paga, pero no tin nodi bai mas na un meter di parkér pa paga; e telefon selular ta fungi komo meter di parkér. Si e tempu di parkér a vense, na ora ta drenta un anunsio i for di kualke lugá por paga pa mas tempu pa parkér. E sistema ta brinda hasta e posibilidat pa informá e outomobilista unda tin lugá disponibel pa parkér.
Un otro sistema di pago ta uso di e karchinan pre-paid ku por swipe contact-less na e meter. Ademas ta eksistí e opshon ainda pa paga ku moneda. En prinsipio e papel no ta nesesario mas, pero si ta deseá, por prent esei. Den sentro di siudat lo lanta tambe stashonnan di karga pa outonan eléktriko, loke ta kuadra ku e idea di SMART CITY.

Securitas
Securitas (Antias) BV a entregá e petishon pa por hiba e maneho di parkér. Defuntu èks-gezaghebber Anne Kibbelaar a lanta e kompania na 1982. Den transkurso di añanan e kompania a krea e fama di ta lider di seguridat ku mas ku 350 kolaborador, bou di guia di e direktornan Jeroen Kibbelaar, Guido Kibbelaar i Paul de Kloet.
Den e asuntu aki Securitas lo fungi komo kontratista prinsipal i finalmente esun responsabel pa ehekushon i mantenshon, pero pa e infrastruktura tékniko di e meternan di parkér e ta konta ku Flowbird Group for di Fransia i ku Dynaf di Kòrsou pa e stashonnan di karga pa e vehíkulonan eléktriko. Pa e ehekushon operashonal Securitas ta hasi uso tambe di su empresanan ruman Impacto Schoonmaak i 24/7 Wegenwacht Curaçao.

Ken ta Flowbird?
Flowbird ta e kompania mas grandi di meternan di parkér on street ku mas di 300.000 meter instalá na mas ku 5000 siudat na mas ku 80 pais. Esaki ta representá 70% di e merkado mundial. Na e siudat New York so Flowbird tin 15.000 meter di e mesun modelo ku loke awor ta ofresé Kòrsou. Eksito di Flowbird ta e kombinashon di meternan di parkér inovativo ku software progresivo, fihá pa desaroyá solushonnan SMART CITY (Urban Intelligence). Na Hulanda, ANWB Parkeren ta usa e app di Flowbird riba telefon selular.

Progresivo
Alain Frindel, business development manager di Flowbird i responsabel pa Merka Latina, ta enkantá pa introdusí e konsepto di SMART CITY na Kòrsou. Danielle Chautard, hefe di Merkadeo i Komunikashon di Flowbird, ta splika ku e meternan di parkér tipo Strada Generation 3 por hopi mas ku solamente paga pa parkér. P’esei Flowbird ta yama e meter di parkér ‘kiosko’. “P’esei, na diferente pais ta usa e ‘multi-service kiosks’ pa paga karchi pa bùs òf trein, entrada pa parke, pa paga but i otro kuentanan di Gobièrnu, i pa formalisá derecho di parkér, por ehèmpel pa habitantenan, doñonan di pakus, funshonarionan di Gobièrnu, dòkternan, etc. Ya ku pa siman mas ku 100 mion hende ta usa nos sistema, ta di vital importansia pa nos buska solushon fásil pa nan. Konstantamente nos ta traha pa kumpli ku deseonan di nos klientenan”. Alain Frindel ta agregá ku por lesa bon loke tin riba e pantaya di koló 7 inch (18cm) ora tin solo fuerte tambe. Na hopi pais ta usa e ‘kioskonan’ tambe komo pilá di informashon pa bishitantenan di siudat i turista.
Jeroen Kibbelaar di Securitas ta bisa na final: “Esaki ta un oportunidat úniko pa Kòrsou pa djoin e desaroyo di e SMART CITY digital nobo. Nos ta haña ku mester tin atenshon tambe pa e eksperiensia positivo di e kliente, banda di e infrastruktura tékniko superior di Flowbird. Por ehèmpel, Securitas lo usa golfcarts, ku ta bon pa medioambiente, pa e kontroladónan ku ta di trein pa duna servisio, por ta na e sitio rápidamente”.
Securitas a inkluí den su proposishon ku minimalmente un-terser parti di e entredanan di parkér ta bai pa Gobièrnu.

Wielklem
Den kaso ku un outomolista no a paga i e haña su wil di outo di klèm, e por yama e sentral di 24/7 i dentro di algun minüt e kontroladó di parkermentu ta yega na e outo; por paga mesora, sea na efektivo òf di forma digital, i ta kita e klèm ei mes. Pues, e kliente no tin nodi kana mas bai un ofisina pa paga i bai bèk na su outo pa warda te ora nan ta bin kita e klèm na e wil.