Recientemente Aruba Scholarship Foundation a tene su Ceremonia Anual na unda 13 studiante a ricibi un beca pa sigui un estudio superior den exterior. Presidente di Aruba Scholarship Foundation, Sr. Frits Goedgedrag a felicita y elogia e hobennan y nan mayornan. El a mustra su satisfaccion y alegria pa e interes, motivacion, determinacion y prestacion academico di e studiantenan. Durante e procedura di selectamento, e studiantenan a destaca pa nan prestacion academico y nan a duna un presentacion impresionante durante e entrevista cu directiva di ASF.

Tambe Sr. Goedgedrag a expresa aprecio pa tur e miembronan di e organisacion pa nan amor pa Aruba Scholarschip Foundation cu tin e becadonan na pecho. Ademas el a gradici nan pa nan bon conseho y determinacion durante e reunionnan. E aña aki ASF a introduci un beca special, banda di e beca usual di tur aña. Pa duna honor na cofundador y ex presidente di Aruba Scholarship Foundation, Sr. Clyde Harms, e organisacion ASF a introduci orguyosamente un beca masha apart cu ta carga e nomber Beca Clyde Harms pa Excelencia Academico. Sr. Clyde Harms kende tabata presente a entega, bou di gran aplauso, e beca aki na tres di e studiantenan.

Di e becadonan tin 6 nobo y 6 repeater. E studiantenan nobo ta Anton Bruin (Accounting), Christopher Engelhart (Biochemistry), Bettiza-Marie Koolman (Cardiovascular), Endry Brito (Biochemistry), Tristan Marchena (Engineering), Joshue Garcia (Graphic Design). Lissey Briesen, Adeline Martinus, Julian de Mey, Flor Romero y Eric Vinck a haya aprobacion di ASF pa continua cu nan estudio cu beca di Aruba Scholarship Foundation.

E becadonan a scoge pa sigui nan estudio na un instituto acredita na Merca, Canada, Colombia y Spaña. Tur invitado tabata hopi contento pa e forma cordial cu nan a wordo ricibi y pa e rato sumamento agradabel.