Turkia – Na e costa occidental den e provincia Izmir (antes Smyrna) den e districto Cesme e ciudad Alaçati ta localisa cu ta specificamente destina pa practica e deporte di windsurf. Cesme ta e region na unda e Jet Set di Istanbul y Izmir ta pasa vakantie. Aki ta unda desde anja 2009 Sarah-Quita ta competi den e disciplina di slalom. E anja aki ta di 7 biaha e ta  competi eynan y ta titula campeon pa di tres anja sigui di e evento aki. E evento aki ta e di dos competencia di Slalom di PWA pa 2014 cu ta conta cu un total di 4 cu posibilidad di salta un pa por conquista e titulo di campeon mundial. E promer evento na Turkmenistan no a conta cu presencia di SQ pa motibo di tawatatin otro compromiso. Durante 6 dia, desde 26 di aug – 31 aug, SQ ta midi forsa cu 22 otro regatista femenino di rond mundo Promer cu yega den e final di cada eliminacion mester  clasifica promer despues pasa pa semi-final y siguientemente p’ e final. Desde e promer eliminacion Sarah-Quita ta domina e caredanan den division femenino. SQ ta pusta sin misericordia y ta laga su oponentenen miyas tras di dje cada biaha cu excepcion di eliminacion 5 unda e ta cambia su equipo pa motibo di biento fuerte cu ta resulta di ta menos fuerte durante di e careda y e ta crusa e finish den tercer lugar. Den e di ocho eliminacion e ta full off cu su timing y ta yega laat na e salida hasta cu e ta den di nuebe lugar na e promer buoy sin embargo e ta recupera batayando fuerte pa termina na di cinco lugar. Danki na e pifia aki di SQ e regatista Turco Lena Erdil por a celebra su promer Victoria eliminatorio desde Aruba na 2011 pa deleite di e spectadornan Turco. Un total di 9 eliminacion a keda completa di cual 7 Sarah-Quita a logra di termina na promer lugar.  Fuera di titula campeon di slalom Sarah-Quita  ta stablece e record di velocidad cu 61km/h birando asina e regatista femenino mas veloz di e asina yama “speed challenge”. Ya pa basta tempo no tawatatin duda di SQ su velocidad pero cu ajudo di e sistema di GPS esaki a keda registra oficialmente durante e evento aki. Remarcable tawata e diferencia den habilidad entre SQ y e demas regatistanan femenino. E bentaha di SQ ta cu e ta calcula su salida cu precision y ta accelera rapido manehando su tabla y vela cu habilidad den cada lorada. Durante e ceremonia di premiacion SQ ta yama Jordy Vonk un regatista Hulandes di apenas 21 anja inmensamente danki di a sponsor e cu velanan extra di su mes, y ta prove’e SQ  e oportunidad di competi. E siguiente eventonan di Slalom ta na Francia y New Caledonia y si e por keda cu e velanan e tin planea pa participa eynan. Den e caso ey, posiblemente eleminando e competencia cu el  a falta na Turkmenistan  e por purba su suerte pa logra titula campeon mundial.Pa  anja 2014 e no tin sponsor di vela cu ta hasi e asuntu complica pa competi den tur disciplina manera el a propone pa su mes. Danki na Dios y su provision e ta logra te awor aki pa realisa su meta.