WILLEMSTAD – Aparte di un kampaña pa soño di futuro di Kòrsou bou di alumnonan di skolnan básiko, Sambil Curaçao a hiba un kampaña komparabel kaminda e públiko grandi por a partisipá n’e. Awe a finalisá e kampaña dòbel di soño ku entrega di e sinku premionan na esnan ku a resultá e kandidatonan rankiá mas haltu for di e kampaña públiko.

Di mes manera atraves di medionan sosial a apelá riba hende pa produsí nan soño pa futuro di Kòrsou den un relato. Esaki atrobe un produsí un kantidat konsiderabel na kontribushonnan for di kua e sinku mihó a bini na remarke pa un premio. Ta públiko por a vota na saka e ganadornan.

E ganadónan

E promé premio a base di e kantidat mas haltu di voto na su fabor a bai pa señora Sarah Pinedo-Volders ku ta gusta biba na Kòrsou, pero na mes momento e ta masha tristu pa e kantidat grandi di bestia ku niun hende no ta prekupá kuné. So soño ta pa tur habitante di Kòrsou bai trata nan bestianan komo kriatura bibu, di moda ku dimes e kantidat grandi di kachó i otro animal di kaya na Kòrsou ta disparsé. Ku su premio señor Pinedo bale na balor di 7500 florin ku e por gasta den pakusnan den Sambil.

E di dos premio, konsistiendo di bale na balor di 3500 florin pa gasta den Sambil, a bai pa Sue Gelly González. E di tres premio na balor di bale di 2000 florin a kai den man di Patrick Doesburg. E di kuater premio, esta 1000 florin na bale, tabata pa Xiomara González i e di sinku premio ku ta 500 florin na bale tabata pa Gedion Zimmerman.

Realisá soño

Managing Director Jonathan Cohen di e sentro nobo di kompra Sambil Curaçao na Vèrs, apesar ku e mes no tabata por tabata presente, a laga komo mensahe atras ku Sambil lo analisá e sinku soñonan aki i otronan i kaminda ta posibel Sambil lo koperá pa krea e sirkunstansianan pa realisá nan.